Kryesore

Pse Veliaj po imiton Fatos Nanon me festimet e Ditës së Verës?





Bëni LIKE faqen zyrtare në Facebook
               Publikuar në : 19:06 - 10/03/19 |
mapo.al

Në mars të vitit 2004, 15 vjet më parë, Fatos Nano po përjetonte ditët e tij më të vështira në pushtet. Opozita shqiptare kishte organizuar në shkurt dy protesta të mëdha, ndër më të mëdhatë e mbajtura deri në atë kohë. Partia Demokratike kërkonte largimin e kryeministrit Fatos Nano duke e akuzuar për korrupsionin galopant në vend.


Protestat e opozitës në fakt vetëm sa i paraprinë largimit të Nanos disa muaj më vonë. Por Nano, në përpjekje për të gjetur një taktikë që do krijonte idenë se është i pëlqyer nga opinioni publik, nuk e mblodhi administratën me përdhunë nëpër bankat e shkollës, siç po ndodh tani. Ai shpalli 14 marsin, Ditën e Verës, një festë kombëtare. Kështu, një festë lokale që kishte si epiqendër Elbasanin, u zhvendos në Tiranë. Të gjithë ishin pushim në atë ditë të nxehtë dhe nëpër qytet u mbajtën organizime festive të shumta.


Të nesërmen, gazeta ZP e Erion Braçës, aktualisht zëvendëskryeministër, shpalli me të madhe se në shesh kishin dalë 300 mijë persona për të festuar kundër Sali Berishës. Se ç’lidhje kishte protesta me festën, hajde merre vesh.


Megjithatë, ajo ishte një kohë e vështirë për Nanon edhe pse në shpinë i ishte vënë lëvizja Mjaft e Erion Veliajt, që sipas analistëve të kohës, vepronte kryesisht në emër të Edi Ramës.


Erion Braçe e kishte ‘halë në sy’ Erionin tjetër, edhe pse qeverisja i bëri bashkë më vonë. Por ishte pikërisht Veliaj, që u bë pjesë e një seance dëgjimore në Kongresin Amerikan, që thuhet se vulosi edhe fatin e Nanos në Uashington.

Tashmë kanë kaluar shumë vite, por ngjan si një ‘deja vu’. Erion Veliaj është kryebashkiak, Erioni tjetër nuk është se e ka sërish për zemër, por tani është Veliaj që po tenton ta përdorë Ditën e Verës sërish për marketing politik, sërish me paratë e taksapaguesve shqiptare.

Veliaj u ka kërkuar shqiptarëve që të shtyjë (!) organizimin e festës më 17 mars, pasi mendon se me 14 do ketë reshje shiu. E sigurt është se festa, nëse do mbahet një ditë pas protestës së opozitës, do përdoret nga mazhoranca për të treguar se qytetarët i besojnë asaj. E kanë bërë diçka të tillë edhe me fotot nga takimet e Ramës në Vlorë e Fier këto ditë, pse të mos e bëjnë edhe të dielën.


Etiketa: , , , ,

Pas