Përfaqësuesja e qeverisë, ministrja për Arsimin, Besa Shahini deklaroi sot publikisht se i ka kërkuar Presidentit Meta shkarkimin e Rektorit të Universitetit të Tiranës, Mynyr Koni.
Sipas saj, Koni është shkaktar i moszbatimit të ligjit të Arsimit dhe ngërçit të krijuar në Universitetin e Tiranës.
“Më vjen keq për zotin Koni, unë jam udhëheqëse dhe dua të sigurohem që reforma po zbatohet. Është e vështirë që të marrësh vendim për të pezulluar dikë që është zgjedhur me vota. Vendimin për të shkarkuar Rektorin e merr Presidenti dhe ai do ketë në dispozicion çdo informacion. Jam dakord me Presidentin ku në Universitetin e Tiranës, nuk është zbatuar ligji dhe është keqmenaxhuar. Jam e bindur që Presidenti do të marrë vendimin e duhur për të zgjidhur ngërçin në Universitetin e Tiranës”. Kështu u shpreh Shahini pa dhënë detaje të mëtejshme se cilat janë shkeljet konkrete të rektorit Koni.
Kujtojmë se Rektori Mynyr Koni ka qenë në shenjestër të Kryeministrit Rama, i cili e kishte paralajmëruar masën ndëshkimore ndaj tij.
Deklarata e Ramës më 3 Prill 2019 për Rektorin e UT-së:
“E vetmja gjë që nuk ka pësuar asnjë lloj lëvizje nga gjithë ajo që u krijua (protesta) është xhaketa e rektorit të universitetit. Se ka ndodhur se nuk ka ndodhur protesta, i vetmi që nuk e ka marrë vesh dhe nuk ka asnjë shqetësim dhe rrezik akoma nuk e di se ka ndodhur dhe se ka pasur kërkesa është xhaketa e rektorit. Kjo është pikëpyetje, në radhë të parë për ju si studentë, se nesër do të shkoni prapë në fakultet dhe prapë nuk do të punojë ai. Do të vijë një ditë dhe ju do të shkoni prapë te ministria dhe do të thoni na hiqni rektorin, ndërsa ju e keni aty rektorin.
Ministrja e Arsimit ka të drejtë që të kërkojë shkarkimin e rektorit dhe e bën për 30 ditë, kohë që i jepet Presidentit për të vendosur nëse e pranon ose jo këtë gjë. Unë nuk e përjashtoj që kjo të ndodhë”.
Rama në Twitter, më 14 Dhjetor 2018 (kur protestonin studentët)
“Zoti Rektor i UT, unë e mëshiroj pafytyrësinë Tuaj të dyfytyrtë dhe reagimin Tuaj tipik për burrat rrëshqanorë! Sidoqoftë,unë shumë shpejt do të jem auditor më auditor,ku shpresoj të keni kurajon të m’i thoni në sy veshëgjatësitë e shkruara në reagimin Tuaj që flet vetë për Ju😊”
