Kryeministri Edi Rama po mban një konferencë për mediat me kancelarin gjerman, Olaf Scolz, pas takimit që patën mes tyre. Ata iu janë përgjigjur pyetjeve të gazetarëve, ku ndër të tjera ka qenë edhe çështja e integrimit në BE, nëse Bullgaria vijon të pengojë Maqedoninë e Veriut, duke vendosur veton ndaj saj.
Rama ka konfirmuar edhe rezultatin të Këshillimit Kombëtar, që kërkonte ndarjen e Shqipërisë nga Maqedonia e Veriut. Kryeministri u shpreh se do të presin deri në qershor për integrimin, në të kundërt do të fillojnë konsultimet për trajtimin e dy shteteve në mënyrë të veçuar.
“Kjo do të ndodh vetëm nëse në qershor nuk do të hapen përsëri formalisht negociata për Shqipërinë për shkak të Bullgarisë. Deri në qershor, siç e kemi shtruar edhe në këshillimin me shqiptarët ,ne do të vijojmë të jemi në një linjë me Maqedoninë, që të dyja vendet duhet të marrin dritën jeshile. Nëse edhe në qershor Bullgaria do pengojë Maqedoninë, ne do të kërkojmë ndarjen nga Maqedonia”, tha Rama.
