Analisti Fatos Lubonja, ka komentuar zhvillimet e fundit në vend, në një intervistë për News-24, duke u ndalur veçanërisht në ato brenda PD.
Sipas Lubonjës, nga e gjitha kjo, është Edi Rama që po përfiton dhe fërkon duart. Ai është skeptik për politikën në tërësi, pasi thotë se ende nuk ka parë një udhëheqës që të vendosë interesin e Shqipërisë, mbi atë personal.
“Nuk kam parë politikan shqiptar që të vendosë interesin e Shqipërisë mbi atë personal, kjo nuk diskutohet, ky është problemi. Sa i përket sinqeritetit, çdo politikan shqiptar, duhet t’ia kthesh ato që thotë së prapthi për të gjetur kuptimin. Kritika ime kryesore qëndron në faktin se unë duke parë metodën si u hoq Berisha shoh dy probleme të mëdha; 1 që ka të bëjë me raportin e amerikanëve me Edi Ramën dhe qeverinë, ku çdokush mund të ndihet i rrezikuar që një intrigë që mund të bëjë një lider i pushtetshëm, që ka arritur të krijojë ca lidhje me disa lobingje amerikane, mundet të të rrëzojë si rivalin e vet. E dyta, mënyra se si e hoqi Lulzim Basha nuk është mënyra që do të doja unë dhe nuk është mënyra për t’u forcuar opozita, përkundrazi, unë shoh një opozitë që dobësohet. Padyshim Berisha është përgjegjës për shumëçka që po ndodh në Shqipëri që fillojnë qysh herët. Eshtë krijuar një sistem për të cilin të gjithë kanë kontribuar dhe kanë vendosur nga një ingranazh”, u shpreh Lubonja.
“Ne shqiptarët e kemi marrë se me amerikanët nuk do të luftohet. Këtu s’bëhet fjalë për luftë ushtarake, apo politika amerikane në një kuptim më të gjerë sepse ne jemi pjesë e NATO-s, e Europës, s’ka lëvizur kurrë asgjë në këtë drejtim. Në këtë aspekt, këtu bëhet më shumë fjalë për intriga politike, që lidhen sa me interesat që Edi Rama i ka zgjidhur këtyre, sigurisht edhe me të kaluarën. Berisha padyshim ka të gjithë mëkatet e veta. Lëvizja e tij dobëson PD dhe nga kjo fërkon duart Edi Rama. Unë luftën e Berishës e shoh me skepticizëm sepse ai në këtë rast ka të drejtë për metodat që thashë, por nuk shoh mundësinë që një Berishë3 të ndërtojë një PD siç do të doja unë ta ndërtonte. Këtu është problemi më i madh. Unë tani i shoh më të dobët, sepse në vend që të merren me mazhorancën, do të merren me njëri-tjetrin”, deklaroi Lubonja.
