Garancia sovrane në mbështetje të investimeve në bujqësi do t’i shtohet programeve aktuale të qeverisë për lehtësimin e kreditimit.
Kryeministri Edi Rama ishte sot në aktivitetin e zhvilluar për prezantimin e kësaj nisme mbështetëse të zhvilluar në mjediset e Ministrisë së Bujqësisë dhe Zhvillimit Rural.
Qeveria e jep këtë garanci në kreditimin e investimeve për të financuar kolateralin e kredive të bujqësisë me synim zbutjen e nivelit të interesit për fermerët shqiptarë dhe agropërpunuesit.
“Koha e bujqësisë së mbijetsës ka perënduar. Ka perënduar koha e bujqësisë vetmitare e atyre që mbeten vetëm në kufijtë e ngastrës së tyre pasi është e pamundur, sado që të bëj shteti për to që të garantohet një ardhme më e mirë, sesa pamja e një mbijetese torturuese. Nga ana e qeverisë në sektorin e bujqësisë, në sektorin e të gjitha punëve të fshtait që lidhen me prodhimin bujqësor, blegtoral është e domosdoshme që të shikohet e ardhmja me syrin e inovacionit, me syrin energjive të reja e sipërmarrjeve që beson tek investimi i kapitalëve dhe tek ndërveprimi me bankat. Ajo që kemi sot nuk është një arsye për të qenë plotësisht të kënaqur, por për të qenë të bindur se kjo është rruga.
Me bankën evropian u alokuam 118 milion euro për të ndihmuar sektorë jetikë si bujqësia dhe turizmi duke lehtësuar financimin e tyre. Janë 6000 përfitues nga fondi i garancisë dhe janë 72 mln euro të disbursuara nga ky fond. Mbetet ende në dispozicion një pjesë e konsiderueshme e fondit. Ashtu siç vihet një dispozicion një fond tjetër nga garancia sovrane për të mundësuar kreditimin e bujqësisë. Koha e shtetit shpëtimtar ka vdekur bashkë me komunizmin. Shteti nuk është shpëtimtari është mbështetës dhe garant në aspektet që lidhen me lirinë e konkurrencës dhe garantimin e mekanizmave të aksesit në financa. Përtej kësaj shpëtimtarët e të ardhmes janë ata që i kanë vërë historitë e suksesit”, – tha Rama.