Kryeministri Edi Rama ishte i pranishëm në ceremoninë e maturës së shkollës “Sami Frashëri”, në mjediset e saj të reja.
Në shkollën e mesme të rindërtuar, ndër më të njohurat në Tiranë, gjatë fjalës së tij Rama, iu tha gjimnazistëve që të mos i harrojnë kurrë sakrificat e nënave dhe të baballarëve.
“Me këtë rast, nga këtu nuk ka vend më të mirë për t’i uruar me gjithë zemër prindërit e maturantëve. Së dyti, falenderoj nga zemra të gjitha mësueset tuaja për të gjithë kujdesin që kanë treguar dhe për respektin që tregoni për ta”.
Maturantëve ai u tha me keqardhje se nuk do ta shijojnë ndërtesën e re, ndërsa nga aty kryeministri ironizoi sërish faktin që të gjithë në vend të dijes po pajisen me dokturatura dhe mastera dhe ndoshta dha një mesazh që në vend të kartonëve të kërkojnë dijen.
“Më vjen keq që ju tani po ikni, ndërkohë që shkolla e re do të hapet në shtator, por janë pak shkolla ndër të cilat është dhe Sami Frashëri që nuk janë vetëm shkolla, por vllazëri që vazhdon ndër vite dhe dekada. Unë nuk e kam pasur fatin që të kem qenë tek Samiu, i përkas ketegorisë së dytë, kam qenë tek Liceu Artistik”.
“Jo të gjithë e kanë fatin që të shkojnë tek Samiu apo disa shkolla që janë kulte. Nga të gjithë këta të rriturit këtu, jam i bindur se unë jam i vetmi që nuk kam doktoraturë, as master, kam një diplomë ‘bojaxhiu’, tha Rama duke iu referuar diplomës së tij në pikturë, por mesa duket, ka ironizuar sërish faktin që doktoraturat janë kthyer në një “send pa vlerë”, megjithëse shumë zëra pretendojnë se edhe nga qeveria e drejtuar prej tij nuk është bërë asgjë për t’i dhënë atyre vlerën që meritojnë.
“E rëndësishme është që ju kurrë të mos dorëzoheni për të realizuar çdo ëndërr që e shikoni me sy hapur. Nga ëndrrat me sy mbyllur bëni kujdes. Kjo botë është e atyre që nuk dorëzohen, unë ju uroj nga zemra që ju të realizoni ëndrrat tuaja. Kini besim, asgjë nuk është e pamundur nëse ju keni besim,”- theksoi Rama, në inaugurimin e “Sami Frashërit”.