Kryeministri Edi Rama deklaroi të hënën se ka ndërmend të jetë edhe ministër i Jashtëm, pas vendosmërisë së presidentit Ilir Meta për të mos shkarkuar Ditmir Bushatin nga ky post në një periudhë të ngarkuar për diplomacinë.
Interesant është fakti se mediat patën raportuar se Ilir Meta ia kishte bërë i pari Ramës një propozim të tillë, që të mbante të dy postet, njësoj si homologu i tij grek.
A tregon kjo se Rama dhe Meta po i zbusin tensionet mes tyre? Reagimet e sotme ishin më të buta. Rama tha se do e dërgojë çështjen në Kushtetuese, kurse Ilir Meta tha se nuk ka më shtet fals në Shqipëri.
A është ky triumf në dëm të Lulzim Bashës, siç kanë komentuar disa analistë, që thonë se opozitën e vërtetë po e bën Ilir Meta? Edhe kjo vështirë të thuhet, në kushtet kur pavarësisht tensioneve, Edi Rama ia kanë lënë gjithmonë një derë hapur kreut të shtetit.
Deri më tani mund të thuhet se Edi Rama vazhdoi me mendjen e tij për të mos lejuar ndonjë figurë të PS që të marrë drejtimin e diplomacisë, por e mori vetë përsipër.
Vendosmëria e Ramës për të vijuar i vetëm çdo betejë u duk edhe kur ai nuk pranoi të shprehej nëse do e rikandidojë Erion Veliajn për Tiranën, duke thënë se këtë e ka në dorë Zoti.
Zoti deri më tani e di të sigurt që axhenda e Ramës si kryeqeveritar dhe kryediplomat do jetë shumë e ngjeshur. Problemet politike po ashtu.
