“Nuk i kemi bërë të gjitha ato që kemi thënë”, u shpreh kryeministri Edi Rama në seancën e sotme plenare, teksa kërkon një mandat të tretë nga shqiptarët.
Kreu i qeverisë deklaroi se projekt buxheti i vitit 2021 do të miratohet sot, dhe nga 1 janari do të bëhet realitet. Rama gjithashtu foli për rindërtimin e rritjen e pagave për mjekët, infermierët dhe mësuesit.
Kryeministri theksoi se mazhoranca nuk i ka bërë të gjitha ato që ka thënë, por kjo sipas tij nuk përjashton mundësinë për t’i bërë në të ardhmen.
“Ky buxhet i 2021 konfirmon edhe njëherë tjetër së bashku me gjithë sistemin e reformuar fiskal. Taksa 0 për biznesin e vogël është dhe do mbetet aty. Ja u kam thënë deri në 2029 bizneset e vogla nuk do të kenë taksë mbi fitimin dhe TVSH deri në 100 mijë dollarë xhiro.
Na duhet të financojmë Rindërtimin, na është dashur të financojmë në gjithë periudhën e mbylljes një numër të barabartë me çerek milion njerëz individë. T’i financojmë, dhe me këtë buxhet bëjmë një rritje pagash, më thoni kush e bën në rajon. Rritja e pagave nuk është hajde ta bëjmë sot e ta heqim nesër.
Është angazhim për gjithë vitet. 40% rritja e pagave për infermierët e mjekët, angazhim i gjithë buxhetit. Miratohet sot. Nga 1 janari e më tej është aty. Nuk lidhet me COVID-19. Edhe rritja e pagave për mësuesit, angazhim për sot nesër e për në të ardhmen i patundur.
Janë angazhime financiare të mëdha, jo të vogla në kushtet kur ne jemi si gjithë të tjerët me kaq shumë shtrëngesa nga pandemia, dhe të diktuar nga fatkeqësia e 26 nëntorit. Ka ndonjë shqiptar që mendon me kokën e tij, që sheh me sytë e tij, dëgjon me veshët e tij, që dallimi mes nesh dhe atyre që janë jashtë e këtu brenda, është jo vetëm tek vizioni e idetë, por ne bëjmë atë që themi, dhe themi atë që bëjmë.
S’flasim në ajër, për të kapur një votë këtu e dy vota atje. Ky buxhet është fakt, jo program dëshirash. Nuk i kemi bërë të tëra ato që kemi thënë, po kjo s’do të thotë që nuk do i bëjmë.
Jo se e them unë, sepse e thotë progresi i vazhdueshëm. Atëhere shëndetësia falas nuk është një premtim si heqja e taksës; e thamë sot, e hoqëm nesër. Shëndetësia falas është projekt, vizion. Drejt saj janë hedhur hapa gjatë gjithë kësaj kohe”, tha Edi Rama.
