Kryeministri Edi Rama ka udhëtuar dy herë ditën e sotme me helikopterin “Cougar” të ushtrisë.
Rama iku nga fusha e sportit e Himarës për në Vermosh me helikopter ditën e sotme për të inauguruar pikën e re kufitare me Malin e Zi dhe është rikthyer sërish në Himarë me helikopter.
MAPO sjell ekskuzivisht videon e momentit kur kryeministri zbret nga automjeti “Lincoln” dhe ngjitet në helikopterin e ushtrisë.
Në rrjet nuk kanë munguar kritikat për kryeministrin i cili përdor helikopterin në një kohë kur vendi është i “pushtuar” nga zjarret dhe autoritetet nuk kanë mjetet e duhura për t’iu përgjigjur emergjencës.
Shtëpitë e banorëve përreth stadiumit dridhen kur helikopteri ulet në fushën e gjelbër të Himarës. E njëjta situatë është përsëritur edhe gjatë pasdites, kur helikopteri është kthyer me kryeministrin në bord.
Kreu i qeverisë po pushon prej disa ditësh në rezidencën qeveritare të Himarës. Mësohet se Rama do të ketë edhe një darkë pune me ambasadoren e SHBA, Yuri Kim e cila gjithashtu po pushon në bregdetin e jugut, teksa sot takoi banorë të fshatit Vuno.
***
Ditën e sotme është regjistruar në vendin tonë viktima e parë nga zjarret. Ai është Andrea Haxhiaj, i cili vdiq teksa luftonte për shuarjen e flakëve së bashku me bashkëshorten e tij. Gruaja e të ndjerit ndodhet në spital pasi ka marrë plagë të shumta nga flakët.