Kryeministri Edi Rama është vetshpallur head-hunter, i kthjellët dhe i qartë në atë çfarë kërkon: kandidatë të përshtatshëm që plotësojnë kërkesat e konsumatorëve.
E tillë është gjuha e tregut ekonomik, por t’i rikthehemi podiumit politik.
Rama, ky rekrutues i pamëshirshëm, ka pikasur figura që diç impakt kanë patur tek njerëzit. Me një gamë të gjerë kompetencash, vijnë në listën e deputetëve socialistë për zgjedhjet më 25 prill, Najada Çomo dhe Luljeta Bozo.
E para një mantelbardhë, drejtuese e betejës me Covid-19, ndonëse figurë e shoqëruar shpesh me pikëpyetje përsa i takon integritetit moral në menaxhimin e pandemisë. Nuk janë të pakta hapësirat që krijuan debat, fill pasi u bë publik kandidimi i mjekes Çomo në logon e PS-së. Mes dyshimit nëse ajo po përdoret nga head-hunteri lypës, i gjatë, i drejtë, luftues. Apo e kundërta.
E dyta, profesoreshë e inxhinierisë së ndërtimit, që i ka kushtuar gjithë jetën studimit të dherave, dhe që u njoh prej të gjithëve në moshën 77-vjeçare, fill pas katrahurës materiale dhe shpirtërore që solli tërmeti shkatërrues më 26 nëntor 2019. Në fjalët e profesoreshë Bozos, vetëm vend për pesimizëm nuk ka. Nuk kishte dy vite më parë, kur mijëra banorë vrapuan në rrugë nga frika për jetën. Dhe nuk ka as sot teksa gjendet përballë kryeministrit Edi Rama dhe strategjisë së tij më të fundit, se mandati i dytë u thye, u shkërmoq nga pandemia e tërmeti, dhe se si i pari i familjes po bën çdo gjë që i treti të jetë i lavdishëm, me premtime të mbajtura, shtëpi të rindërtuara e virus të shtypur me këmbë.
Mjeshtëria e Ramës në propagandë, nuk njeh limite.
Vijon lënia në hije e masave konkrete, teksa kursi agresiv i mpirjes së shqisave dhe mendimeve po shtrihet kudo dhe ngado. Sepse i pari i familjes, kërkon kundrim, jo gjykim. Sepse i pari, i madhi, i gjati, nuk do t’ia dijë për përgjegjësitë e shtetit të rilindjes, ndonëse vlerëson, himnizon dhe dekoron me urdhëra kalorsiakë.
Qeveria dështoi t’i përgjigjej në kohë krizës së shkaktuar nga tërmeti, dështoi të siguronte ndihmën e duhur njerëzore dhe ekonomike ndaj biznesit dhe qytetarëve përgjatë pandemisë.
Ky është fakt!
Njerëz në qiell të hapur, të prekur dhe të vdekur, sikundër dekorata të fotografuara e filmuara si mos më mirë. Buxheti 2021 nuk është ideuar për t’i ndihmuar qytetarët, kësisoj varfëria do të rritet, dhe shqiptarët do të kthehen 15 vite pas në kohë.
Në një spital gjeografikisht në një cep të Italisë, një i prekur nga një sëmundje fare e papërfillshme, troket për shpëtim. Përgjigje për të janë mjekë e infermierë të sëmurë deri në prag vdekjeje, me dëshirën për t’u ankuar. Dhe mes dilemave dhe dyshimeve për vendndodhjen, merr një tjetër përgjigje, nga një vajzë e re, e porsa ardhur në ambientet spitalore. Një pohim, se jo më kot personeli mjekësor i këtij spitali hiçgjendur është vlerësuar si më i miri në Europë. Sepse shërojnë edhe më të regjurit, siç janë, siç ndjehen dhe flasin.
Tregim i shkurtër ky nga novelisti italian Dino Buzzati, që si për çudi asociohet më së miri me head-hunterin dhe strategun e kompanisë mavi.
Dhe më të regjurit, padyshim, shërohen, kur shohin të parin, të madhin dhe të gjatin, siç është, siç ndjehet dhe siç flet.
