Kryeministri Edi Rama është pyetur në fillim të emisionit Opinion, për rastin e Dibrës, ku dy militantë të shtabit elektoral të PS u kapën me 5 milionë lekë dhe materiale zgjedhore, teksa tentonin të blinin vota në Maqellarë.
Rama iu shmang këtij fakti, dhe u hodh në sulm ndaj kundërshtarit, duke akuzuar për ngritjen e strukturave paramilitare.
Fevziu tha se ata janë kapur në flagrance sot në Dibër, por sërish Rama tha se pamjet që qarkullojnë, janë të turpshme jo për ata që do blinin vota, por prej atyre që ndaluan autorët e krimit zgjedhor.
Kryeministri duke iu shmangur thelbit, tha se akuzat janë pjesë e ndotjes së procesit dhe Partisë Socialiste.
Ndërkohë, tha se ata që akuzojnë, i kanë duart me gjak, pasi kanë vrarë një njeri në Elbasan dhe kanë plagosur një police.
Rama vazhdoi të komentojë ngjarjen e Elbasanit, duke thënë se nëse do të kishte ndodhur anasjelltas, që grupe të PS do të kishin vrarë një mbështetës të PD dhe Taulant Balla të kishte mbajtur një fjalim para kufomës, do të ishte djegur Shqipëria.
