Pas një konference për shtyp për mbi dy orë, kryeministri Edi Rama u shfaq edhe pasdite në konstituimin e Këshillit Bashkiak të Tiranës dhe betimin e kryebashkiakut Erion Veliaj. Lëvizja e radhë e kryeministrit u prit me disa kritika online. Kjo për shkak jo vetëm të pavarësisë së pushteteve, por edhe sepse votimet e fundit u mbajtën pa opozitën.
“Bashkia vdiq e bashkë me të dhe kolona tjetër e sistemit demokratik, Vetëqeverisja Vendore. Nga sot nuk ka të zgjedhur të qytetarëve por të emëruar të qeverisë. Nga sot monizmi është kthyer në formë e përmbajtje. Nga sot Erion Veliaj është kryetar i ri i Komitetit Ekzekutiv Tiranë,” tha Kreshnik Çollaku, zyrtar i PD dhe ish-anëtar i Këshillit Bashkiak.
Kurse ish-ministri i Drejtësisë, Ylli Manjani ironizoi duke thënë se as Erdogan nuk e bën diçka të tillë.
“Mos u çudisni kur ta shihni ndonjë ditë edhe në krye t’vendit te Gjykata e Lartë. Tani që kjo gjykatë ka mbetë pa Kryetar dhe po mbushet me gjykatës të përkohshëm, shkon ai. S’ka as fytyrë e as frikë. Kulturë ligjore jo e jo! Ndarja e pushteteve është një parim që ka mbetur në letër pa vlerë që quhet Kushtetutë.
Imagjinoni Merkel të çelë mbledhjen e këshillit monopartiak të bashkisë Berlin!!! As Erdoganit si shkon mendja ta bëjë këtë gjë. Të paktën jo vizualisht. Bën edhe si shok i ngushtë me Macron, pa lë!”, shkruan Manjani.
Etiketa: betimi, Edi Rama, Erion Veliaj, kritikat, Ylli Manjani
