Dy persona janë arrestuar për vrasjen e 42-vjeçarit grek, i cili u rrah brutalisht nga pesë persona, jashtë një lokali nate. Të dy të arrestuarit janë me origjinë shqiptare, por njëri ka nënshtetësi greke.
Sipas informacioneve nga ato që ata i kanë thënë policisë, rrëmuja ka nisur për një arsye të parëndësishme. Konkretisht, duke shkuar në tualet, 42-vjeçari ka prekur njërin nga pesë personat dhe ka pasur një sherr të vogël mes tyre.
Sipas të arrestuarve, viktima kur është kthyer i ka parë me një vështrim të egër dhe më pas kanë vendosur ta sulmojnë.
Ata e kanë pritur dhe kur ka dalë me të dashurën e tij, e kanë sulmuar brutalisht.
Dy të rinjtë që ndodhen në pranga, janë ata që kanë goditur 42-vjeçarin, ndërsa pjesa tjetër e grupit nuk është përfshirë drejtpërdrejt në rrahjen e tij, megjithatë ata janë identifikuar dhe janë në kërkim nga policia.
Autoritetet i arrestuan sipas dëshmive të dëshmitarëve, si dhe nga kamerat e dyqanit që regjistroi makinën me të cilën u arratisën autorët.
Policia po përpiqet të zbulojë se cili nga të dy ka qenë ai që ka goditur në kokë 42-vjeçarin, ndërsa nuk dihet nëse kanë përdorur grusht hekuri.
“Policia greke dëshmoi edhe një herë se po vepron me efektivitet me arrestimin e dy vrasësve të 42-vjeçarit në Rafinë”, ka shkruar ministri i Mbrojtjes Civile, Takis Theodorikakos në llogarinë e tij në Twitter.
