Atmosferë e relaksuar duket të ketë qenë ajo e të dielës mbrëma për krerët e koalicionit PANA, bashkë me presidentin e Kosovës, Hashim Thaçi dhe kryeministrin shqiptar, Edi Rama.
Duke qenë se fotografinë e ka postuar në profilin e tij në Instagram, i biri i presidentit Thaçi, Endriti, dhe duke parë pozicionimin e Thaçit, mendohet se fotoja është bërë në shtëpinë e këtij të fundit.
Sidoqoftë mbi tavolinën e tyre shihen verë e ëmbëlsira, shkruan Koha Ditore.
Koalicioni me kryeparlamentar Kadri Veselin, kryeministër Ramush Haradinajn e zëvendëskryeministra Fatmir Limajn e Behgjet Pacollin, ka kaluar ditët e fundit përplasje të mëdha kryesisht rreth taksës që Qeveria i ka vënë mallrave nga Serbia e Bosnjë dhe Hercegovina. SHBA-ja dhe BE-ja bëjnë thirrje të vazhdueshme për heqjen e saj.
Haradinaj insiston që ajo të mbetet, Thaçi ka dhënë ndërkombëtarisht fjalë se ajo mund të hiqet, kurse Veseli kërkon që të pezullohet për 120 ditë.
Haradinaj ka thënë se presidentin Thaçi nuk e ka takuar një kohë të gjatë.
