Dobësimi i Euros kundrejt Lekut po prek një rekord historik. Sipas të dhënave nga Banka e Shqipërisë, deficiti i llogarisë korrente për tre muajt e parë të vitit kishte vlerën e 233 milionë Eurove, vlerë kjo 57% më e ulët krahasuar me tremujorin e fundit 2021 dhe 22% më e ulët krahasuar me të njëjtën periudhë të vitit të kaluar.
Sipas Bankës së Shqipërisë, këtë mërkurë Euro preku një minimum të ri historik, duke arritur nivelin e 119.54 Lekëve.
Nga ana tjetër, efekti i rritjes së çmimeve në bilancin tregtar të vendit këtë vit po rezulton më i kufizuar krahasuar me tremujorin e fundit të vitit të kaluar. Rritja e deficitit tregtar në mallra këtë tremujor është ngadalësuar ndjeshëm krahasuar me tremujorin IV 2021, ndërsa llogaria e shërbimeve ka rritur edhe më shumë kontributin e vet pozitiv. Ky faktor ka zbutur kërkesën për euro dhe trysnitë nënçmuese në kursin e këmbimit të Lekut ndaj monedhës europiane.
Paralelisht, llogaria e shërbimeve ka vazhduar të përmirësohet, kryesisht falë ndikimit pozitiv nga turizmi, shërbimet e transportit dhe ato të fasonerisë. Këtë vit, numri i vizitorëve nga jashtë vendit është kthyer pranë niveleve të para pandemisë dhe kjo po reflektohet në shtimin e flukseve valutore hyrëse. Hyrjet e shtetasve të huaj u zgjeruan me 42% me bazë vjetore në 4-mujorin e parë të vitit.
Të ardhurat nga turistët për tremujorin e parë të vitit arritën vlerën rekord të 409 milionë Eurove, në rritje me 70% krahasuar me të njëjtën periudhë të vitit të kaluar. Edhe të ardhurat nga shërbimet e fasonerisë shënuan një vlerë rekord prej 158 milionë Eurosh, 24% më shumë krahasuar me një vit më parë.
Në muajin maj, inflacioni arriti nivelin më të lartë në më shumë se 20 vjet, n. Shqipëria raporton ndër nivelet më të ulëta të inflacionit në Europë. Një nga faktorët që vlerësohet se i ka zbutur disi presionet e jashtme inflacioniste ka qenë pikërisht edhe kursi i këmbimit. Kursi i këmbimit mes Euros dhe Lekut, në vlerat aktuale, paraqitet në rënie me 2.5% krahasuar me të njëjtën periudhë të një viti më parë.
Forcimi i Lekut ndaj Euros, që është edhe monedha kryesore në këmbimet e tregtisë së jashtme të vendit tonë shoqërohet me një efekt amortizues në përcjelljen e inflacionit të importuar në ekonominë shqiptare.
