Restoranti Jumbo Floating i Hong Kongut, një atraksion turistik i famshëm, por i vjetër që u shfaq në filma të shumtë kantonez dhe hollivudian, u tërhoq nga qyteti. Tentativat për ta shpëtuar nuk funksionuan.
Restoranti me një gjatësi prej 76 metrash mund të shtronte njëherësh 2,300 tavolina. I projektuar si një pallat perandorak kinez dhe dikur konsiderohej një pikë referimi që duhet parë, restoranti tërhoqi vizitorë të famshëm nga Mbretëresha Elizabeth II te Tom Cruise dhe u shfaq në disa filma — duke përfshirë “Contagion” të Steven Soderbergh-ut, rreth një pandemie vdekjeprurëse globale.
Operatorët e restorantit luksoz përmendën pandeminë Covid-19 si arsyen e mbylljes përfundimisht të dyerve të tij në Mars 2020, pas rreth një dekade vështirësish financiare.
Pronari i restorantit Melco International Development njoftoi muajin e kaluar se përpara skadimit të licencës në qershor, Jumbo do të largohej nga Hong Kongu.
Nën qiejt me re, një grup i shpërndarë shikuesish u mblodhën në bregun ujor të Aberdeen për të parë largimin e restorantit që pluskonte mbi ujë.
Z. Wong, një burrë 60-vjeçar, i cili i tha AFP-së se kishte ardhur posaçërisht për të parë largimin e restorantit.
“Ishte për shumë vite një simbol i Hong Kongut,” tha ai, duke shtuar se kishte ngrënë atje një herë 20 vjet më parë. “Besoj se do të kthehet dhe e pres me padurim”.
I hapur në vitin 1976 nga manjati i ndjerë i kazinosë Stanley Ho, Restoranti Jumbo Floating mishëronte lartësinë e luksit, që thuhet se kushtoi mbi 30 milionë HK dollarë (3.8 milionë dollarë) për t’u ndërtuar.
Ai paraqiste një “fron dragoi” në stilin e dinastisë Ming, si dhe një mural të pasur, sipas South China Morning Post.
Restoranti u mbajt në këmbë nga industria e lulëzuar e turizmit të Hong Kongut, por popullariteti i tij ishte zbehur vitet e fundit edhe para se të godiste koronavirusi.
Operatori i restorantit Melco tha muajin e kaluar se biznesi nuk kishte qenë fitimprurës që nga viti 2013 dhe humbjet kumulative kishin tejkaluar 100 milion HK dollarë (12.7 milion dollarë).
Përshtati Liberale.al
