Ish-ministri i Bujqësisë i Partisë Demokratike, Rexhep Uka nuk pranon të jetë pjesë e garës për President të Republikës.
Ai është shprehur për Gazetën Panorama se, e shikon si një përgjegjësi shumë të madhe.
“Tashti nuk jam më i ri. E njoh mirë situatën. E bluaj, njoh edhe politikën. Ky është fakti që më frenon. Nuk bëhem më si “kau balash”“, është shprehur Uka.
Pjesë nga intervista te Gazeta Panorama:
Gazetari: Nëse propozimi do të formalizohet, do të shkojë në Parlament, do të ishit i gatshëm ta pranonit?
Rexhep Uka: Jo, jo, jo. E shikoj një përgjegjësi shumë të madhe. Për këtë çështje kam një pikëpamje dhe bëj analiza shumë të thella për gjëra të tilla. Tashti nuk jam më i ri. E njoh mirë situatën. E bluaj, njoh edhe politikën. Ky është fakti që më frenon. Nuk bëhem më si “kau balash”. Jam në fazën kur opinioni publik, njerëzit që më kanë mbështetur, njerëzit që më njohin, atë punë e kam provuar, kam tentuar dhe i kam thënë të gjitha mendimet e mia në të gjitha epokat. Në një farë mënyre kam shprehur atë që ndiej, por edhe kam kuptuar se ku gjendem. Dhe hiç nuk ka lidhje me mua kjo. Por gjithsesi e vlerësoj shumë faktin që deputeti më propozoi.
Kujtojmë se, ishte Xhelal Mziu, ai i cili propozoi ditën e djeshme emrin e Rexhep Ukës për presidentin e ri.
Po ashtu Mziu propozoi edhe Dashamir Shehi dhe Halim Kosovën. /Liberale.al
