Profesori i Financës, ish-deputeti i PD, Sherefedin Shehu, ka dalë në skenën politike pas një mungese prej afro 3 vitesh. Për kujtesë z. Shehu la mandantin e deputetit për të garuar për Bashkinë e Dibrës në 2016 kur u bënë zgjedhjet e parakohshme. Shehu humbi përballë kandidatit të PS, Muharrem Rama.
Sot Sherefedin Shehu ka bërë një status në facebook kundër Bashës. Ai ka marrë shkas nga takimi që zhvilloi Basha në Dibër, ku përmendi dhe dosjen “184”. Shehu thotë se është bërë viktimë e kësaj dosje por sot nuk është më në PD dhe për këtë fajëson Bashën.
“Kreu i PD-së nuk është në gjendje të mbajë shtëpinë e tij, ndaj nuk mund të besojnë njerëzit se ai do të rregullojë Shqipërinë”, shkruan ai.
Reagimi i plotë i Sherefedin Shehut në facebook dhe komentet ndaj tij:
Të Dashur Dibranë,
U gëzova shumë që ju pashë të shtuar dhe me entusiazëm në mbështetje të PD-së. Por, meqenëse Basha foli më shumë për dosjen 184, duhej ta kishit pyetur se ku e ka protagonistin e tij që kjo dosje e viktimizoi dhe PD-së i legjitimoi çadrën. Dhe këtë nuk po jua kërkoj që unë të fitoj pikë por kjo pyetje e ndihmon PD-në për të gjetur rrugën e fitores.
Nëse shqiptarët shikojnë se kreu i PD-së nuk është në gjendje të mbajë shtëpinë e tij nuk mund të besojnë se ai do të rregullojë Shqipërinë. Nëse standartet e mira që i përmend çdo ditë nuk i zbaton për vete, nuk besoj se mund t’u mbushësh mendjen të tjerëve se do ti zbatosh për Shqipërinë.
Dosja 184 dhe shumë dosje të tjera tregojnë se kjo nuk është Qeveria që shqiptarët duan, por askush nuk mund të pranojë Republikë të Re me mendje të vjetër. Sepse kjo bëri që të hysh në çadër dhe të mos dish si të dalësh prej andej dhe tani që i dogje mandatet kam frikë se flaka e tyre do të fiket shpejt. Zoti e ndihmoftë PD-në dhe Shqipërinë.