Ish-ministri i Bujqësisë, Edmond Panariti beson se bujqësia e Rilindjes po “korr” atë që mbolli, rënien e saj të lirë.
Në një postim në rrjetin social “Facebook”, Panariti shkruan se rënia ka filluar që nga viti 2017 dhe që prej atëherë, nuk ka të ndalur, dhe se më e pafalshmja është braktisja e këtij sektori në situatën e pandemisë Covid-19.
Ai gjithashtu i kundërvihet deklaratave të ministrit të Bujqësisë, Blendi Çuçi, përsa i takon fondeve të subvencioneve të bujqësisë përpara tre viteve.
“Rënie e dukshme dhe e vërtetueshme për të gjithë ata që e duan të vërtetën dhe kanë sy dhe veshë për të parë dhe dëgjuar statistikat e vetë INSTAT. Ndryshe nga sa deklaron ministri i Bujqësisë ( i referohet Blendi Çuçit), nuk ishte LSI por ishte Partia e tij që mori drejtimin e Agjencisë së pagesave (AZHBR) në korrik të 2017, për aplikimet të cilat u mbyllën në mes të qershorit të atij viti. Dhe i bllokoi ato, i devijoi ato… Kjo është lehtësisht e vërtetueshme”, shprehet Panariti.
“Bujqësia i vetmi sektor që nuk përfitoi asnjë qindarkë nga fondet e luftës! Nuk ka ndodhur kjo gjetiu, në asnjë vend të përgjegjshëm dhe normal. Prandaj po korrni atë që mbollët!”-përfundon ai.
Etiketa: Covid-19, Edmond Panariti, ministria e bujqesise, pandemi, subvencione
