Gjithçka është gati në Moskë për të hedhur në hap vendimtar për luftën në Ukrainë, aneksimin e katër rajoneve të pushtuara, Donetsk, Lugansk, Kherson dhe Zaporizhzhia. Në kryeqytetin rus tashmë janë ngritur skena, postera patriotike dhe ekrane gjigante nga ku do të bëhet njoftimi dhe padyshim çdo lloj demonstrimi proteste është i ndaluar.
Të premten e 30 shtatorit do të bëhet ceremonia e pritur në Kremlin, 15:00 me orën e Moskës, për aneksimin e kërkuar nga Putin dhe të sanksionuar me referendumin plebishitar të martën.
Siç njoftoi zëdhënësi i Kremlinit, Dmitri Peskov, Putin do të ulet në tryezë në sallën e Shën Gjergjit dhe do të nënshkruajë traktatet e anëtarësimit në Federatën Ruse me katër liderët. Peskov parashikoi që menjëherë pas kësaj, presidenti rus Putin do të mbajë një fjalim të ri para kombit, i ndjekur nga një takim me administratorët e rajoneve ukrainase të aneksuara nga Moska.
Vendimi i Vladimir Putin për të inkorporuar zyrtarisht rajonet Donetsk, Lugansk, Kherson dhe Zaporizhzhia përfaqëson aneksimin më të madh në Evropë që nga Lufta e Dytë Botërore dhe do të ketë ndikime afatgjata.
Sipërfaqja totale e destinuar për t’u bërë pjesë ‘de facto’ e Rusisë arrin në mbi 90,000 km katrorë, ose rreth 15% e sipërfaqes totale të Ukrainës, e barabartë me madhësinë e një kombi të tërë. Është një zonë ku jetojnë rreth 4 milionë njerëz.
Ky është një aneksim i paralajmëruar prej kohësh, por me pasoja në shkallë të gjerë duke pasur parasysh se pasi të aneksohet kjo zonë, udhëheqja ruse ka thënë se do t’i konsiderojë sulmet ndaj zonave të kontrolluara si një sulm të drejtpërdrejtë ndaj Rusisë, me pasojë mundësinë e përdorimit të armë bërthamore.
Referendumet, të cilat sipas rezultateve të raportuara nga media shtetërore ruse treguan mbështetje dërrmuese për bashkimin me Rusinë, ishin një farsë për Perëndimin. Banorët që ikën nga zonat e kontrolluara ditët e fundit treguan për njerëzit e detyruar të votojnë në rrugë nën kërcënimin e armëve, por tani Putin mund të luajë kartën e kërcënimit të sigurisë kombëtare ruse.
