Furnizuesi rus i energjisë “RAO Nordic”, thotë se do të pezullojë dërgesat e energjisë elektrike në Finlandë nga e shtuna. Kompania thotë se shkak i kësaj ndërprerje është mospagimi për dërgesat e mëparshme.
Operatori finlandez i rrjetit tha se nga Rusia siguron vetëm një përqindje të vogël të energjisë elektrike të vendit dhe se ajo mund të zëvendësohet nga burime alternative.
Të enjten, Rusia kërcënoi se do të ndërmerrte “hapa hakmarrëse” pasi Finlanda tha se planifikonte të bashkohej me NATO-n.
Finlanda ndan një kufi prej 1,300 km (810 milje) me Rusinë dhe më parë ka qëndruar jashtë NATO-s për të shmangur antagonizimin e fqinjit të saj lindor. Megjithatë, që pas pushtimit të Ukrainës nga Rusia, ka pasur një rritje të mbështetjes publike për anëtarësimin në NATO.
Të dielën Finlanda pritet të shpallë zyrtarisht planin e saj për t’u bashkuar me Organizatën e Atlantikut të Veriut.
Vendimi i “Rao Nordic” nuk ka qenë i lidhur në mënyrë eksplicite me vendimin e Finlandës.
Firma shtetërore ruse tha: “Kjo situatë është e jashtëzakonshme dhe ka ndodhur për herë të parë, gjatë njëzet viteve të historisë sonë tregtare”. As “Rao Nordic” dhe as operatori i rrjetit në Finlandë, “Fingrid”, nuk shpjeguan se çfarë fshihej pas vështirësive të pagesës.
Muajin e kaluar Rusia ndërpreu furnizimet me gaz për Bullgarinë dhe Poloninë, pasi ato refuzuan të përmbushin kërkesën për të paguar në rubla, një ndryshim që ata thanë se do të binte ndesh me sanksionet perëndimore.
Këtë javë Gazprom i Rusisë njoftoi se do të ndalonte furnizimin me gaz nëpërmjet pjesës polake të tubacionit Yamal-Evropë.
Fingrid tha se nuk priste mungesa të energjisë elektrike si rezultat i mbylljes, pasi vetëm rreth 10% e energjisë elektrike të Finlandës furnizohet nga Rusia.
“Mungesa e importit të energjisë elektrike nga Rusia do të kompensohet duke importuar më shumë energji elektrike nga Suedia dhe duke gjeneruar më shumë energji elektrike në Finlandë,” tha Reima Päivinen, nënkryetare e lartë e sistemit energjetik në “Fingrid”.
Kërkesa po zvogëlohet gjithashtu ndërsa moti bëhet më i ngrohtë, pasi një sasi e konsiderueshme e prodhimit shtesë të energjisë së erës pritet të hyjë në qarkullim. Një stacion i ri i energjisë bërthamore, që pritet të hapet këtë verë, do të kompensonte më shumë se furnizimet e humbura nga Rusia, shtoi Fingrid./BBC- Liberale.al
