Një orë pune u kushton sipërmarrjeve shqiptare mesatarisht 351 lekë, ku kostot përfshijnë pagën e nëpunësve, kontributet e paguara nga punëdhënësi, kostot e trajnimit, taksat e punës dhe shpenzime të tjera.
Instituti i Statistikave pa publikuar rezultatet e anketës së zhvilluar pranë 2980 ndërmarrjeve me mbi 10 të punësuar në të gjithë vendin, referuar bilanceve të vitit 2016. Krahasuar me rezultatet e anketës së vitit 2012, kjo kosto është rritur me 11.8%, ku ndikimi më i madh është ndjerë tek ndërmarrjet me mbi 1 mijë të punësuar, ndërsa ai më i vogël tek bizneset nga 50-249 punonjës.
Nga rezultatet e publikuara vihet re një diferencë e madhe mes sektorëve, ku kostoja për orë pune mund të variojë deri në trefish.
Sipërmarrjet që kanë kostot më të larta janë ato që zhvillojnë aktivitete financiare dhe të sigurimit, ku një orë pune kushton 700 lekë. Në bazë të orëve totale të paguara, kjo kosto mblidhet në mbi 124 mijë lekë në muaj. Pagat dhe kontributet zënë pjesën më të madhe të kësaj kostoje, ndërsa një pjesë e vogël prej 1.45% shkon për trajnimet profesionale të cilave u nënshtrohen punonjësit.
Sektori financiar krijon një diferencë të madhe me aktivitetet e informacionit dhe komunikacionit, që zënë vendin e dytë për kosto pune, por me vetëm 521 lekë për orë. Në muaj, kostoja për një punonjës të sipërmarrjeve që operojnë në këtë fushë llogaritet në 91 mijë lekë.
Sipërmarrjet e tjera që kanë kostot më të larta janë edhe ato që zhvillojnë aktivitete profesionale, shkencore dhe teknike, si dhe ato që kryejnë furnizimin me energji elektrike, gaz e avull dhe me ajër të kondicionuar.
Nga ana tjetër, si sipërmarrjet me kosto më të ulëta të punës renditen ato që veprojnë në sektorin e akomodimit dhe shërbimit të ushqimit, si hotelet dhe restorantet; si dhe industrinë përpunuese, si rrobaqepësitë, përpunimi i ushqimit, etj. Për restorantet, kostoja për orë pune është vetëm 241 lekë, me një total mujor prej 41 mijë lekësh.
Ndërsa për industrinë e përpunimit, një orë pune kushton vetëm 250 lekë, çka shpjegohet me pagat e ulëta të sektorit, të cilat nxjerrin një kosto mujore prej vetëm 45 mijë lekësh. Një kosto shumë të ulët kanë edhe aktivitetet me ujë të ngrohtë, kanalizimeve, menaxhimit të mbeturinave dhe rregullimit, me një kosto prej 254 lekësh për orë pune.
Ndërkohë, subvencionet e marra nga ndërmarrjet për të amortizuar këto kosto kanë një ndikim shumë të vogël me vetëm 0.06% për bizneset e anketuara. Sektorët që përfitojnë më tepër nga subvencionet janë arsimi me një lehtësim në kosot prej 0.19%, industria përpunuese me 0.15% dhe aktivitetet e tjera të shërbimit me 0.14%. / Scan
