Pas nënshkrimit të Lukakut, Interi është një hap larg nga Alexis Sanchez. Vijon pra merkatoja e nxehtë e zikaltërve me Manchester United. Legjenda e “Djajve të Kuq”, Gary Neville, e këshillon klubin e njohur anglez që ta shesë sulmuesit kilian. Duke folur në mikrofonat e “Sky Sport”, ish-mbrojtësi shprehu mendimin e tij “pa dorashka”: “Unë e kisha mirëpritur ardhjen e tij te Manchester United, sepse është një sulmues i zellshëm, i cili di të luajë mes linjave dhe aq më shumë, shënon rregullisht. Por, ai ishte një fatkeqësi në “Old Trafford”.
Unë nuk e di se çfarë ka ndodhur. Duhet të jenë dy Sanchez. Ai luajti dhe shkëlqeu tek Arsenali e Barcelona, por një tjetër më duket se mbërriti te Manchester United. Klubi duhet ta shesë atë, ashtu siç bëri me Lukakun. Shoh 4-5 lojtarë, që nuk duan të qëndrojnë në Manchester. Solskjaer duhet ta heqë qafe një çift prej tyre këtë verë, pastaj çiftin tjetër ta largojë vitin e ardhshëm”.
