Eksperti i ekonomisë, njëkohësisht presidenti i UET, Selami Xhepa deklaroi se personat me të ardhura të larta mund të taksohen në shifrën 28%. Ai shtoi se pritet edhe një riklasifikim i kategorive të të punësuarve, ku përfshihen edhe të vetë-punësuarit.
“Një taksë shumë e lartë, mendohet se do të jetë 28% për ata që kanë të ardhura shumë të larta. Pritet të ketë një riklasifikim të kategorive të të punësuarve, duke përfshirë edhe të vetë-punësuarit”, tha Xhepa në emisionin “Mirëmëngjes” në “Euronews Albania”.
Ai e cilësoi një gangrenë të politikë-bërjes në vend, ndryshimin e shpeshtë të ligjeve tatimore. Xhepa u shpreh se kjo praktikë është shumë e dëmshme jo vetëm për bizneset, por edhe për qytetarët.
“Është gangrena e përhershme në Shqipëri. Ligjet që ndryshojnë më shpesh në Shqipëri,kanë qenë ligjet tatimore. Është praktika më e keqe, më e shëmtuar, më e dëmshme për bizneset por edhe për qytetarin e thjeshtë. Ligjet tatimore në Shqipëri, janë gangrena e politikë-bërjes në vend”, u shpreh ai.
Sipas ekspertit, qeveria do të rishikojë barrën tatimore për grupe të caktuara shoqërore, bazuar edhe te rekomandimet e Fondit Monetar Ndërkombëtar.
