Mijëra serbë që mbanin flamuj rusë e serbë dhe fotografi të presidentit rus Vladimir Putin marshuan nëpër Beograd të premten për të protestuar ndaj mbështetjes së Serbisë për pezullimin e Rusisë nga Këshilli i OKB-së për të Drejtat e Njeriut, raporton KosovaPress.
Demonstrata, e organizuar nga grupi i ekstremit të djathtë anti-imigrues, Patrulla Popullore, u mblodh në monumentin e Carit rus Nikolai II në qendër të Beogradit dhe prej andej shkoi në ambasadën ruse duke brohoritur, “Serbët dhe rusët vëllezër përgjithmonë, “Jo NATO” dhe “Krimeja është Rusi, Kosova është Serbi”.
Ata ndezën pishtarë dhe hodhën bomba tymuese para godinës së presidencës serbe, duke brohoritur parulla kundër presidentit Aleksandër Vuçiç. Policia nuk ndërhyri, raportoi Radio Evropa e Lirë.
Protesta u mbështet edhe nga lëvizja e djathtë Dveri, e cila po hyn në Kuvendin e Serbisë me 10 mandate të fituara në zgjedhjet e 3 prillit.
