Fitorja është i vetmi opsion për përfaqësuesen tonë të futbollit në ndeshjen përballë Bjellorusisë pasi synimi është renditja në krye të grupit të katërt të Ligës C.
Atmosfera në skuadër është pozitive pasi vjen pas dy fitoreve radhazi, në ndeshjen miqësore përballë Kosovës dhe atë përballë Kazakistanit në Nations League.
Futbollistët e dinë mjaft mirë se nuk mjafton kaq pasi për të realizuar objektivin duhet edhe një sforco e fundit. Kundërshtari nuk është i panjohur pasi në ndeshjen e parë të grupit ishte përfaqësuesja jonë që fitoi 2-0.
Edoardo Reja përveç mungesave që dihen tashmë do bëjë llogaritë edhe pa Armir Abrashin që ka plotësuar numrin e kartonëve dhe pa Elseid Hysajn që rezultoi pozitiv me COVID-19.
Megjithatë tekniku nuk kërkon justifikime dhe ka besim se lojtarët që ka në dispozicion do ja dalin të bëjnë mirë në këtë ndeshje.
Skema duket se do jetë ajo që Reja përdor gjithmonë 3-5-2.
Në portë tekniku pritet t’i besojë Etrit Berishës ndërkohë përpara tij Ismajli, Gjimshiti dhe Veseli duken të sigurt. Në mungesë të Hysajt do ketë vend për Albi Dokën ndërkohë që Uzuni pritet të luajë në krahun e majtë.
Në mesin e fushës Reja ka dyshime mes Kallakut dhe Lacit që janë në balotazh ndërkohë që Gjasula dhe Memushaj duken të sigurt si titullarë.
Maja e sulmit pritet t’i besohet sërish Cikalleshit dhe Rei Manajt.
Ndeshja luhet sot në orën 16:00 në stadiumin “Air Albania”.
Etiketa: Air Albania Stadium, liga e kombeve, ndeshja, Shqiperi-Bjellorusi, stadiumi Air Albania
