UASHINGTON – Kandidatja për ambasadore e SHBA-ve në Shqipëri, Yuri Kim, doli në një seancë dëgjimore në Senatin amerikan këtë të martë. Ajo deklaroi se nëse konfirmohet në detyrë do të ketë tre prioritete. Fillimisht do të inkurajojë Shqipërinë që të vazhdojë kursin për të dhënë 2% në NATO deri në vitin 2024.
Së dyti, Kim theksoi se do të vazhdojë të promovojë zhvillimin demokratik të Shqipërisë, duke ndikuar që vendi të dalë nga kriza politike ku ka hyrë prej disa muajsh. Ajo u shpreh se sapo të marrë misionin e saj në Tiranë, do të ndikojë te liderët e mazhorancës dhe opozitës që vendi të kalojë situatën e vështirë politike.
“Në terma të menjëhershëm, do të ushtroj presion tek liderët e Shqipërisë që të kalojnë krizën politike aktuale”, tha ajo.
Kandidatja për ambasadore përmendi edhe reformën në drejtësi, duke theksuar se procesi i ardhshëm është ai për ngritjen e SPAK dhe BKH. “SHBA-të do të inkurajojnë Shqipërinë që të implementojë në mënyrë të plotë reformën në drejtësi, të vazhdojë vettingun e gjyqtarëve dhe prokurorëve dhe të themelojë SPAK dhe BKH”, tha ajo. “Së treti do të promovoj investimet amerikane në Shqipëri në mënyrë që të rriten zhvillimet në të dyja vendet”, ka shtuar e nominuara për ambasadore të SHBA në vendin tonë.
Ajo tha se sheh si përpërësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional. Shqipëria, tha Kim në seancë, ka një emër jo të mirë për krimin e organizuar, për trafikimin e njerëzve, sidomos të grave si dhe të narkotikëve përmes kufijve.
Gjithashtu Kim u shpreh se do ta ndihmojë Shqipërinë që të ketë paraqitje sa më të mirë në Presidencën që do të ketë në OSBE.
Ndërsa duke u fokusuar te angazhimi në NATO, ajo tha se ushtarët shqiptarë kanë luftuar krah për krah me trupat amerikane në Afganistan dhe kanë shërbyer për këshillimin dhe trajnimin e forcave afgane krahas trupave të SHBA.
Shqipëria, tha zonja Kim, ka qenë një partnere e besueshme në koalicionin global për të mposhtur ISIS-in dhe “ka treguar se jo vetëm vlerëson përfitimet nga anëtarësimi në NATO, por edhe përqafon përgjegjësitë që burojnë nga të qënit anëtare e aleancës”.
Duke iu përgjigjur një pyetjeje të senatorëve për ndikimin e mundshëm të Rusisë në rajon, zonja Kim tha se fatmirësisht, përpjekjet e Rusisë në këtë aspekt nuk kanë patur shumë efekt. Për këtë arësye, tha zonja Kim, “e kemi për detyrë që t’i mbajmë më afër miq të tillë si Shqipëria në kohë si kjo”. Ka rëndësi, tha ajo, që t’i ndihmojmë shqiptarët të forcojnë institucionet, në mënyrë që ata të jenë më rezistentë ndaj përpjekjeve të Rusisë si dhe të depërtimit ekonomik të Kinës.
Nëse konfirmohet në detyrë ajo do të jetë e para femër koreano-amerikane që të përfaqësojë si ambasadore SHBA-të.
KARRIERA DIPLOMATIKE
Yuri Kim është anëtare në stafin e lartë të Shërbimit të Huaj dhe ka shërbyer në Departamentin e Shtetit si Drejtore e Zyrës së Çështjeve të Evropës Jugore.
Më herët, ajo ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake.
Ajo ka qenë gjithashtu Asistente Speciale e Ndihmës Sekretarit të Shtetit për Çështjet e Azisë Lindore dhe Paqësorit dhe anëtare e delegacionit të Shteteve të Bashkuara në bisedimet gjashtëpalëshe për t’i dhënë fund programit bërthamor të Koresë së Veriut.
Zonja Kim ka shërbyer si Këshilltare Politike në Ambasadën e Shteteve të Bashkuara në Bagdad dhe në Ankara. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor.
LEXO EDHE:
