Real Madrid është fituesi i “Klasikes” së Spanjës, që u zhvillua nën një shi të rrëmbyeshëm. Ekipi i Zinedine Zidane u tregua superior ndaj Barcelonës, sidomos në pjesën e parë, duke shënuar dy gola.
Rezultatin e zhbllokoi Karim Benzema, më një gol fantastik me takë, pas krosimit të Vazquez. Goli i dytë erdhi me goditje dënimi. Gjuajtja e Toni Kroos u devijua dy herë përpara se të hynte në portën e mbrojtur nga Ter Stegen.
Në pjesën e dytë, Barcelona reagoi me mbrojtësin Mingueza që shkurtoi diferencën, ndërsa Jordi Alba nuk shfrytëzoi një rast të mirë, i vetëm përballë Courtois.
Në minutat e fundit të ndeshjes, Casemiro u ndëshkua me dy kartona të verdhë brenda një kohe të shkurtër, duke ia vështirësuar 4 minutat e shtesës madrilenëve. Në sekondat e fundit të ndeshjes, fati nuk ishte me katalanasit, që goditën traversën me Dembele.
Por, rezultati nuk ndryshoi, me Real Madrid që parakalon Barcelonën dhe barazon në krye të renditjes Atletico Madrid, me 66 pikë.
