Nga Aranit Muraçi
Ballkani i Hapur, i pranuar deri tani nga Shqipëria por jo nga Kosova, duket se i ndan politikisht Tiranën dhe Prishtinën, por jo ekonomikisht. Të dy vendet kanë vendosur të heqin plotësisht doganat me njëra-tjetrën duke mundësuar shkëmbi tregtare si të kishin një treg i përbashkët.
Është mbajtur sot në Prishtinë mbledhja e tetë e përbashkët mes Shqipërisë e Kosovës, ku u firmosën 19 marrëveshje e memorandume mirëkuptimi.
Në mbledhjen e tetë të dy qeverive shqiptare të Kosovës dhe Shqipërisë 19 marrëveshjet e bashkëpunimit kanë për qëllim forcimin e bashkëpunimit mes vendeve si dhe të lehtësojnë jetën e qytetarëve në fusha të ndryshme të jetës.
Në këto marrëveshje përfshihet njohja reciproke e licencave të avokatëve ndërmjetësve dhe zbatimin e dënimeve alternative që japin gjykatat e dy vendeve, apo edhe ndërtimi i linjës hekurudhore Durrës-Prishtinë.
Në 110 vjetorin e Pavarësisë, Shqipëria dhe Kosova do të mbajnë një Kuvend të përbashkët.
Një nga pikat e kësaj marrëveshje është veç bashkimit doganor edhe pranimi i studenteve në Institucionet e Arsimit të Lartë të Republikës së Shqipërisë dhe Republikës së Kosovës.
Rama tha se është rënë dakord për një abetare unike mes Shqipërisë dhe Kosovës, si dhe Enciklopedinë Shqiptare, e cila do të financohet nga dy qeveritë.
Sa i përket “Ballkanit të Hapur”, Rama e pranoi se Tirana dhe Prishtina kanë politikisht disa mosdakordësi, duke i quajtur ato normale, kurse Kurti e quajti bashkëpunimin tregtar mes dy vendeve tepër pozitiv, ndërsa për Ballkanin e Hapur u shpreh se nuk ka asgjë për të shtuar. “Procesi i Berlinit ndoshta kërkon një fillim të ri”, tha Kurti. “Marrëveshjet e sotme i shërbejnë përbashkimit mes nesh”, theksoi kryeministri i Kosovës. Atëherë, pyetja që shtrohet është se çfarë i pengon në të gjitha fushat e tjera të bashkëpunimit Tiranën dhe Prishtinën, veç asaj që quhet “Ballkani i Hapur”, një projekt politik që synon zbutjen e konflikteve rajonale para anëtarësimit në BE, edhe pse qëllimi i saj është që të ketë lehtësira tregtare mes të gjitha vendeve të Ballkanit?
Më poshtë, 19 marrëveshjet e plota të firmosura mes ministrave dhe në fund nga dy kryeministrat, Rama e Kurti:
1-Marrëveshje bashkëpunimi për pranimin e studentëve në institucionet e arsimit të lartë të Republikës së Shqipërisë dhe Republikës së Kosovës.
2-Protokoll për implementimin e kontrollit të përbashkët kufitar në pikën e përbashkët të kalimit kufitar Morinë/Kukës.
3-Protokoll për regjimin e trafikut lokal të kufirit në zonat kufitare ndërmjet kufirit shtetëror të Republikës së Shqipërisë dhe Republikës së Kosovës.
4-Memorandum bashkëpunimi për ngritjen e një grupi të përbashkët pune për bashkim doganor.
5-Marrëveshje administrative për zbatimin e marrëveshjes për sigurime shoqërore.
6-Memorandum mirëkuptimi për sektorin e energjisë.
7-Memorandum bashkëpunimi për bashkëpunim mbi zhvillimin e terminalit të Vlorës.
8-Marrëveshje bashkëpunimi në fushën e zbatimit të programeve të mbështetjes për bujqësinë dhe zhvillimin rural.
9-Memorandum mirëkuptimi për bashkëpunim në fushën e gjendjes civile.
10-Marrëveshje bashkëpunimi për shkëmbim përvojash në proceset teknike.
11- Marrëveshje bashkëpunimi për vlerësimin e gjendjes dhe përmirësimin e rrugëve të fshatrave ndërkufitare që lidhin zonat kufitare Shqipëri-Kosovë.
12-Marrëveshje bashkëfinancimi për studimin e fizibilitetit dhe projekt – idesë për lidhjen hekurudhore Durrës-Prishtinë.
13- Marrëveshje për bashkëpunimin në fushën e shëndetësisë për shërbimin e ndërsjelltë ndërkufitar.
14-Marrëveshje për bashkëpunimin në fushën farmaceutike dhe të pajisjeve mjekësore.
15-Marrëveshje bashkëpunimi për krijimin e një platforme të përbashkët digjitale të informacionit dhe promovimit turistik.
16-Marrëveshje për bashkëpunim në fushën e rinisë.
17-Marrëveshje për bashkëpunimin në fushën e kërkim shpëtimit malor dhe ujëra territoriale.
18-Deklaratë e përbashkët e Ministrave të Drejtësisë të Republikës së Shqipërisë dhe Republikës së Kosovës.
19-Marrëveshje bashkëpunimi për bashkëfinancimin e projektit madhor në albanologji enciklopedia shqiptare. /Liberale.al/
