Manchester City regjistroi përqindjen më të ulët të posedimit të topit gjatë drejtimit nga Pep Guardiola. Kjo ndodhi mbrëmë, në humbjen 3-2 ndaj Wolves. Ish-trajneri i Barcelonës dhe Bayern Munich është i njohur për ndërtimin e skuadrave, që rrallë e lëshojnë topin nga këmbët, Këtë “specialitet” e ka shijuar rregullisht, sa i takon posedimit, me “qytetarët” në Premier League. Sidoqoftë, portieri Ederson u largua me karton të kuq që në minutën e 12-të të lojës, kështu që kampionët anglezë në fuqi mbetën me një forcë më pak se kundërshtari. Me siguri, kjo ndikoi që skuadra e Nuno Espirito Santo të dominojë kontrollin e topit.
Vendësit e kufizuan Manchester City në posedimin e topit në masën vetëm 37.8%, shifra më e ulët e regjistruar nga një skuadër e drejtuar nga Guardiola në nivelet e larta (jo te Barça B). Kjo shifër është dukshëm më pak se tjetra më e ulët në karrierën e Guardiolës si trajner, 46.7%, e regjistruar nga Manchester City në fitoren 2-1 ndaj Chelsea, në nëntor. Pavarësisht se mbetën në inferioritet numerik që në fillimin e hershëm të ndeshjes, “qytetarët” e panë veten në epërsinë 2-0, në minutën e 50-të, me Raheem Sterling që shënoi dy gola. Sidoqoftë, avantazhi i tyre nuk do të zgjaste, sepse vendësit shënuan tri herë me anë të Adama Traore, Raul Jimenez dhe Matt Doherty.
Një fitore e tillë e Wolves, që përmbys disavantazhin e dyfishtë (2-0), ishte e para ndaj Manchester City, që nga sezoni 1999-2000, në nivelin e dytë të futbollit anglez. Po kështu, ishte e para në Premier League, që prej sezonit 1960-1961. “Ujqërit”, gjithashtu, u bënë thjesht skuadra e dytë në histori, që përmbysin disavantazhin 2-0 kundër një skuadre të Pep Guardiolës. Chelsea i Antonio Conte ishte i pari që e bëri këtë në sezonin 2016-2017, kur fitoi edhe titullin kampion. Kjo ishte hera e parë, që Manchester City humbiste një ndeshje të Premier League, kur udhëhiqte me dy, ose më shumë gola, që nga disfata 3-2 e prillit 2018, kundër Manchester United.
Në atë lojë, “Djajtë e Kuq” u kthyen nga disavantazhi 2-0 i pjesës së parë për t’i përmbysur rivalët e të njëjtit qytet, duke ua mohuar zyrtarizimin e titullit kampionit në derbi. Për më tepër, humbja ndaj Wolves do të thotë se skuadra e Guardiolës ka pësuar 23 gola në 19 ndeshjet e Premier League, deri më tani, këtë sezon; aq sa kishte pësuar në tërësinë e kampionatit të saj të fundit. Nëse Liverpool fiton kundër Wolves, të dielën, atëherë mund ta rrisë hendekun prej 14 pikësh me “qytetarët”. Nëse kjo distancë në renditje shkon në 17 pikë, duket se çështja e titullit mbyllet për Guardiolën dhe të tijtë.
