Media austriake denoncon MetwnTedi Blushi, zëdhënësi i Presidentit Ilir Meta ka reaguar në rrjetet sociale, lidhur me një shkrim të publikuar në një prej mediave austriake, ku thuhet se, kreu i shtetit ka lobuar për të fituar akses në inaugurimin e presidentit të SHBA-ve, Donald Trump dhe tek zyrtarët republikanë, nëpërmjet një kompanie qipriote.
“Presidenti i Republikës, Sh.T.Z Ilir Meta është njohur sot me një shkrim pa autor të publikuar në gazetën austriake “Kronen Zeitung”, artikull që përmban veçse shpifje dhe gënjeshtra, të hershme dhe të konsumuara prej vitesh”, shkruan Blushi.
Radhët e shkruara në median austriake, Blushi i quan shpifje.
“Këto shpifje, mjerisht të fabrikuara dhe të hedhura në tregun mediatik edhe kohë më parë, e kanë marrë përgjigjen shumë të qartë dhe në mënyrë asgjesuese, që në prill të vitit 2018”, vijon ai më tej.
Ndërsa paralajmëron se, “edhe kjo përpjekje e radhës, e rifabrikuar në mënyrë qesharake dhe vulgare, do të marrë përgjigje përpara drejtësisë austriake”.
“Presidenti i Republikës, ka autorizuar stafin dhe mbrojtësit ligjorë, që të përgatisin menjëherë padinë “Për përhapjen e të dhënave të pavërteta”, “Shpifje”, “Cenim të imazhit publik”, që në këtë rast cenon rëndë edhe interesat e larta shtetërore. Në këtë mënyrë, shpifësit do të marrin përgjigjen e merituar përballë drejtësisë. Presidenti i Republikës garanton se beteja e Tij për mbrojtjen e interesit publik dhe luftën kundër korrupsionit, jo vetëm që nuk do të ndalet, por do të përshkallëzohet, që nga zbardhja e plotë e aferës së inceneratorëve (që deri tani vetëm sa është gërvishtur), si dhe të gjitha aferat e tjera”, përfundon Blushi postimin e tij në Facebook.
“Më 20 janar 2017, Meta ndau një foto të tijën dhe të një kolegeje në inaugurimin e Donald Trump në Uashington. Për të fituar akses në inaugurim dhe tek zyrtarët republikanë, ata thuhet se lobuan përmes një kompanie qipriote. Kostoja ishte 700,000 dollarë. Deri më sot, është e paqartë se kush ka paguar në të vërtetë për të. Vetë Meta pretendon se është ftuar nga republikanët. Sipas dokumenteve gjyqësore amerikane, 700,000 dollarë nga një avokat i afërt me Metën kanë kaluar përmes kompanisë offshore Dorelita Limited. Pak javë para inaugurimit është lidhur një kontratë mes LSI-së dhe avokates, e cila parashikon pjesëmarrjen në inaugurim. Menjëherë pas kësaj, Meta u bë edhe president“, thuhet në shkrimin e medias austriake “Kronen Zeitung“. /Liberale.al
