Fshati Qarrishtë shtrihet në një zonë të thyer dhe malore të rrethit të Librazhdit. Është i njohur jo vetëm për shkak të traditës dhe figurave që ka nxjerrë, mjaft të njohur në komunitetin vendas dhe më gjerë, por edhe për një akt humanizmi gjatë Luftës së Dytë Botërore.
Në këtë fshat të thellë u strehuan nga banorët e varfër 26 hebrenj të cilët ndiqeshin nga forcat naziste. Në Izrael ky fshat është nderuar në muzeun Yad Vashem, për kontributin historik të dhënë 76 vite më parë.
Ndonëse Qarrishta ka një emër të lartësuar tashmë edhe ndërkombëtarisht, në realitet gjendja në këtë fshat është për të ardhur keq.
Në një video të publikuar nga deputeti demokrat i Librazhdit, Lefter Gështenja, tregohet me detaje se si pushteti qendror dhe ai lokal, kanë lënë në harresë fshatin duke mos iu përmbushur as kushtet më minimale banorëve, që të kenë një shkollë dhe një qendër shëndetësore dinjitoze, për t’i ardhur në ndihmë këtij komuniteti. Qendra shëndetësore e Qarrishtës duket në gjendje skandaloze dhe pamjet nuk kanë nevojë për koment.
Me siguri tenderat për shkollën dhe qendrën shëndetësore janë realizuar, por destinacioni i parave nuk dihet.
Po ashtu, ky fshat, 32 km larg qytetit të Librazhdit, vuan edhe mungesën e infrastrukturës rrugore. Për qeverinë dhe bashkinë, Qarrishta nuk ekziston, e kjo shpërfillje nga ana e autoriteteve po nxit edhe largimin e atyre pak banorëve që kanë mbetur aty.
Postimi
Fshati Qarrishtë i Librazhdit njihet si “Toka e Besës”. 🇦🇱 👏 Në muzeun e Yad Vashem, në Izrael, emri i fshatit dhe i familjes Biçaku janë gdhendur me respekt për shpëtimin e 26 hebrenjve gjatë luftës. Sot, fshati është lënë në harresë. Nuk ka kushte minimale, as në qendrën shëndetësore e as në shkollë. Ndiqni videon për të mësuar se ç’ka lënë nga pas korrupsioni. 👇
