Komisioni kuvendor i Ekonomisë ka miratuar me konsensus rritjen e kapitalit tek Banka për Zhvillim e Këshillit të Europës. Shqipëria do të derdhë në arkën e kësaj banke një shumë prej 4 750 milionë eurosh. Rritja e kapitalit nuk prek kostot e buxhetit aktual, pasi kjo shumë do të shlyhet në vitet në vijim. Në këtë mënyrë, vendi ynë do të përfitojë më shumë financime nga Banka për Zhvillim e Këshillit të Europës (CEB). Banka që nga viti 2002 ka financuar në vendin tonë 9 projekte të ndryshme sociale, me një vlerë totale prej rreth 90 milionë eurosh. Financimet janë dhënë në formë kredie me interesa të ulëta. Anëtare të CEB-së janë gati të gjitha shtetet europiane, madje dhe Shqipëria ka aderuar në këtë bankë që nga viti 1999, duke nënshkruar kuota me vlerë kapitali prej 8 milionë eurosh. Pas konfirmimit të pjesëmarrjes së të gjitha shteteve në rritjen e kapitalit të bankës, kjo rritje do të arrijë në 3.5 nga 3.3 miliardë euro që është aktualisht.
