Partia Demokratike deklaron se kryeministri Edi Rama nuk ka hedhur asnjë hap për turizmin në 8 vite dhe nuk ka bërë asgjë për të kuptuar potencialin e turizmin.
Zëdhënësja e fushatës së PD-së, Floriana Garo, në një deklaratë për mediat theksoi se Shqipëria ka mbetur pas vendeve të rajonit, ndërsa nga ana tjetër PD ka plane të detajuara, duke bërë thirrje për të votuar numrin 9.
Deklarata e Floriana Garo
“Shqipëria është një perlë e mrekullueshme e Europës. Panoramat dhe plazhet tona duhet të prisnin miliona turistë çdo vit, por Rama nuk ka hedhur asnjë hap në këtë fushë në 8 vite…
Ai nuk ka bërë asgjë për të kuptuar potencialin e turizmit.
Fqinjët tanë, Kroacia, Sllovenia, Mali i Zi, Bullgaria dhe Greqia po e bëjnë të lulëzojë industrinë e turizmit. Ndërkohë, Shqipëria jonë e bukur ka mbetur prapa.
Rama nuk ka bërë asgjë për të krijuar një infrastrukturë të mirë për turizmin- nuk ka as aeroporte, as rrugë dhe as hotele ose mundësi akomodimi.
Ndërkohë që ne, me Partinë Demokratike kemi ndërtuar plane të detajuara në favor të infrastrukturës që do ta kthejë Shqipërinë në një qendër tërheqëse për turistët anë e mbanë botës.
Më 25 Prill, votoni 9 – për Partinë Demokratike dhe Aleancën për Ndryshim dhe kthejeni turizmin në një krenari kombëtare!”.
