Aleksandër Dermentli, kreu i shoqatës “Bashkimi i Shqiptarëve të Ukrainës” ka folur në Euronews për situatën në Ukrainë dhe ka kërkuar ndihmën e shtetit shqiptar, të paktën për të larguar fëmijët
“Uroj që nuk do të ketë. Jemi gati për luftë, kemi marre këshillimet. Kam biseduar me shokë shqiptarë dhe ushtarakë dhe kemi një plan për ditën që mund të jemi në luftë”, tha ai.
“Qyteti ka një plan për t’u organizuar bashkë. Kam shkruar letër Ministrisë së Jashtme, kemi nevojë për ndihmë. Duam të paktën që fëmijët të evakuohen në Shqipëri. Kemi plan që të vijmë në Shqipëri nëse do të ketë luftë”, u shpreh Aleksandër Dermentli.
Shtetet e Bashkuara kanë shprehur frikën se grumbullimi i trupave ruse mund të çojë në pushtimin e Ukrainës. Uashingtoni ka thënë se një gjë e tillë mund të ndodhë në “çdo moment”.
Rusia ka grumbulluar mbi 130,000 trupa në afërsi të kufijve të Ukrainës. Moska ka hedhur poshtë se ka plane që ta pushtojë Ukrainën.
Pasditen e sotme Presidenti Meta thirri mbledhjen e Këshillit të Sigurisë Kombëtare, ku u diskutua për Ukrainën dhe evakuuimin në rast nevoje.
