Bashkëshorti i gruas fatkeqe kërkon nisjen e hetimeve për të kuptuar shkaqet e vdekjes dhe për të konstatuar përgjegjësinë e mjekëve. Tragjedia ndodhi në spitalin Vito Fazzi në Lecce. Viktima quhej Aissatou Bah, një grua e re e lindur në Guinea dhe banuese për disa muaj në Lecce, me bashkëshortin e saj, një punëtor në një kompani vendase, të dy me leje të rregullta qëndrimi.
Aissatou Bah ishte shtatzënë në muajin e katërt, me një vajzë, por, siç raportohet nga bashkëshorti i saj në ankesën e paraqitur në të njëjtën ditë të vdekjes, ajo kohët e fundit nuk ishte mirë, ankohej për të përziera, kishte të vjella dhe mungesë oreksi, aq sa në tre raste u kërkua ndërhyrja e urgjencës. Punonjësit e shëndetësisë kishin kryer disa kontrolle rutinë në shtëpi, por e kishin qetësuar duke pretenduar se ishin sëmundjet klasike të lidhura me shtatzëninë.
Më 25 maj e reja u shtrua në Gjinekologjinë e Vito Fazzi për më shumë kontrolle, por gjendja e saj u përkeqësua gradualisht dhe burri i saj, i cili shkonte për ta vizituar pothuajse çdo ditë, shihte gruan e tij duke vuajtur gjithnjë e më shumë. Më 10 qershor mjekët vendosën t’i abortonin fëmijën, për ta shpëtuar sepse shtatzënia do t’i vinte në rrezik jetën e saj.
“Por edhe pas abortit – vazhdon rikonstruksioni i hetuesve – situata nuk është përmirësuar, kurse burri nuk ka mundur më të flasë më tej, pas abortit, me gruan e tij.
Derisa, në orën 11.52 të datës 14 qershor, i mbërriti telefonata nga departamenti i Gjinekologjisë që i komunikoi vdekjen e gruas së tij. Burri, gjithashtu i ri, 28 vjeç, është nisur me urgjencë në spital i shoqëruar nga një kolege e punës dhe ka kërkuar shpjegime nga mjekët, por vetë mjekët nuk kanë mundur t’i japin përgjigje, për shkaqet e vdekjes.
Për të hedhur dritë të plotë mbi faktet, i riu vendosi të denoncojë të gjithë ngjarjen në organet e drejtësisë, duke i kërkuar prokurorit që të kryejë autopsi për të kuptuar se çfarë ka ndodhur me gruan e tij dhe krijesën që ajo mbante, si dhe për të konstatuar nëse kujdesi i ofruar në spital ka qenë adekuat ose mjekët nuk kanë pasur përgjegjësi në vdekjen e gruas së re
