Mjeshtri Kapexhiu në punimin e sotëm në gazetën Mapo, vë në lojë praninë e Ramës dje në Këshillin Politik, duke e quajtur shtesë të tepërt. Ndoshta nisur nga fakti se prezenca e kryeministrit aty nuk solli ndonjë vlerë të shtuar, për shkak se, me çfarë doli në media, e vetmja gjë e re e takimit të djeshëm për të zgjidhur krizën politike, është se marrëveshja e 5 qershorit mbetet ende e diskutueshme.
Edi Rama ka firmën e tij në atë pakt, që u investua dhe u mbështet nga BE dhe SHBA, dhe megjithatë, edhe pse kanë kaluar 46 ditë, ai ende nuk e ka kaluar në Parlament për ta zyrtarizuar e ratifikuar e për ti dhënë fuqi ligjore.
Kjo përkundër thirrjes së gjithë faktorëve politikë dhe partnerëve ndërkombëtarë.
Kapexhiu e vendos Ramën në një pozicion paradoksal, teksa gjendet në tryezë, dhe pas krahëve të Gjiknurit, njeriut të tij në ato bisedime.
Gjiknuri, pra Rama, me 5 qershor kanë rënë dakort që të kemi një kod të ri zgjedhor, dhe janë angazhuar me firmë, për të mos patur ndryshime të tjera.
Por, pak ditë më vonë, nisën pretendime të reja, që duke u fshehur pas idesë gjasme popullore, të hapjes së listave, synohet ndryshimi i sistemit dhe sidomos ndalimi i koalicioneve.
Rama ishte në ditë të vështira legjitimiteti edhe para kësaj, por sidomos me kursin që ndoqi kundër BE dhe SHBA, e duke qënë se për herë të parë pas 30 vitesh po vihej në diskutim një marrëveshje për të cilën sapo është rënë dakort, duket se është kjo arsyeja pse në sytë e mjeshtrit, kryeministri vjen si shtesë e tepërt.
Karikatura sot e Kapexhiut në gazetën Mapo po shpërndahet masivisht në rrjet.
