Kur Dmitry Khlebushkin u shfaq përpara mediave si një nga të mbijetuarit e tragjedisë së avionit Aeroflot në Moskë, i cili mori flakë teksa kryente ulje emergjence, shumëkush shpërtheu në zemërim.
Rusi obez mbante çantën e tij, të cilën e kishte shpëtuar gjatë ferrit që shpërtheu në avion. Por 41 persona humbën jetën dhe tashmë ka dyshime se pasagjerët e pjesës së parë të avionit kanë ndikuar që bilanci të rritet për shkak se nxituan të marrin çantat e tyre, në vend që të vraponin për të hapur rrugë për të tjerët.
Daily Mail shkruan se vetëm tre pasagjerë që ishin pas sediljes së rusit Khlebushkin, ia dolën të mbijetojnë. Mes 41 viktimave ishin edhe dy fëmijë.
Sipas Bild, në avion ishin 12 sedilje në klasën e biznesit, por të gjithë pasagjerët në radhët e para më shumë kujdeseshin për të marrë çantat e dorës dhe të shpinës, si dhe materialet personale, në vend që të bënin rrugë për evakuimin.
Hetimet për ngjarjen e rëndë po vazhdojnë, ndërsa teoria e parë është se goditja nga rrufeja është shkak për incidentin. Nuk përjashtohet mundësia që pilotët të mos kenë pasur kualifikimin e duhur, por edhe që pajisjet të mos kenë funksionuar.
Në një video të publikuar nga mediat ruse shihet avioni teksa bën një kërcim dhe më pas merr flakë.
Etiketa: avioni, çantat, incidenti, Moskë, shpetimi
