Media britanike dhe e mbarë botës po bën analizën e finales së Champions League, ku Chelsea arriti të triumfojë mbi spektakolarët e Manchester City, falë zgjuarsisë dhe taktikës.
Dhe konkluzioni është; gjermani Tuchel, me klasin e tij, la në hije të madhin Guardiola, duke i hequr mundësinë të hynte në histori si drejtuesi që merr për të tretën herë titullin e kampionit të Champions League.
Vendosja e bluve londinezë, kompaktësia, dhe sidomos kundërsulmet e rrezikshme dhanë rezultat, edhe pse ndeshja e luajtur në Porto, u mbyll vetëm me një gol.
Të gjithë ja njohin Guardiolës meritën e futbollit të bukur, magjik, spektakolar që ka ndikuar mjaft trajnerë e ekipe të tjera dhe ka sjellë një revolucion.
Por në fund vlen rezultati. Dhe kritikat për Pep nuk janë të pakta. Si asnjëherë tjetër në gjithë ndeshjet e sezonit, ai nuk aktivizoi mesfushorët Fernandinho dhe Rodri, ndaj dhe City ishte pak në kaos, nuk shkëlqeu dhe nuk arriti të furnziojë si duhet sulmuesit, të cilët duket se nuk po e gjenin rrugën drejt portës.
Mbrëmë ishte hera e parë që dy mjeshtrat e mesfushës nuk u përfshinë nga Guardiola.
Ndërsa tek Chelsea, ndodhi thuajse e njëjta mrekulli si me herën e fundit kur fitoi këtë trofe. Me trajner të zevendësuar në mes të sezonit, arrin të kapë majën. Në janar, Lampard u zevendesua dhe krijoi jo pak pështjellim. Një paradoks, se si prej rrëmujës në menaxhim vjen suksesi.
Ndeshja ka edhe heroin e vet. Ai është Ngolo Kante, francezi i londinezëve që ishte i pranishëm kudo në çdo çast, në çdo aksion, nga mbrojtja në sulm.
