Analisti Artur Zheji e quan goditjen e tretë që Zëri i Amerikës po i bën kryeministrit Edi Rama. Dy goditjet e para ishin për punësimet nepotike dhe për blerjen e zgjedhjeve.
Por cila është e treta? Bëhet fjalë për raportimet e ashpra të Zërit të Amerikës për situatën e rendit në Shkodër pas ‘xhindosjes së bandave’.
Interesant është fakti se ndryshe nga sa deklaroi drejtori i Përgjithshëm i Policisë së Shtetit, Ardi Veliu mbrëmjen e shkuar se në Shkodër ka më pak vrasje, duke paraqitur një statistikë që mund të ketë disa interpretime, Zëri i Amerikës mendon se nuk ka pasur vrasje më përpara pasi mes bandave ishte vendosur një ekuilibër.
“Por, qetësia mes grupeve u përmbys në 13 janarin e vitit të kaluar, pas një atentati me lëndë shpërthyese të telekomanduar ndaj biznesmenit Lulzim Kulla. Sipas policisë, ai ishte një figurë e njohur e krimit në Shkodër. Në këtë atentat, të kryer fare pranë tregut më popullor të qytetit, mbetën të plagosur 8 persona, mes të cilëve edhe vetë Kulla. Ngjarja u pasua nga atentate të njëpasnjëshme ku, deri tani, kanë mbetur të vrarë 9 persona, ndërsa dy të tjerë figurojnë të zhdukur,” raporton Zëri i Amerikës.
Pikërisht ky është thelbi i problemit në Shkodër. Deri në vendosjen e një ekuilibri të ri mes bandave në qytet, policia vetëm mbledh kufomat e bën sehir. Edhe një aksion i rëndësishëm që bëri Policia e Shtetit, nuk i ndali vrasjet, raporton VOA.
“Ndryshe nga sa pritej, operacioni policor i koduar “Oazi” nuk i dha fund vrasjeve dhe as hakmarrjes mes grupeve kriminale të Shkodrës,” shkruan VOA.
Dhe bandat e Shkodrës nuk kanë një aktivitet të kufizuar, por kontrollojnë që nga droga e deri tek vendosja e basteve dhe dhënia e huave. Kjo bën që qyteti praktikisht të jetë nën pushtetin e një shteti paralel kriminal.
LEXO EDHE:
Video: Momentet kur Asmer Bilali takohet me njerëzit në varrim
