Mes kancalares gjermane, Angela Merkel dhe presidentit francez, Emmanuel Macron po shfaqet një përplasje për emrin që do zgjidhet në krye të Komisionit Europian. Merkel përkrah emrin e gjermanit Manfred Weber, por Macron është kundër. A do e fitojë Merkel këtë betejë? Shanset nuk janë të mira
Kur krerët e shteteve dhe të qeverive të mblidhen sonte për një darkë pune, diskutimi më i nxehtë do jetë nëse politikani europian, Manfred Weber, 46 vjeç, i CSU-së gjermane, do të arrijë të zëvendësojë Jean-Claude Juncker, 64 vjeç, në postin e presidentit të Komisionit Europian.
Çështja është kaq delikate, sa sipas informacioneve të Politico, gjatë diskutimeve nuk do lejohen celularët- siç ndodh gjatë konklavave në Vatikan.
Pretendimi i Weber për pushtet bazohet tek vota e 200 milionë shtetasve të BE-së, edhe pse familja e tij partiake konservatore, PPE, nuk triumfoi plotësisht në zgjedhjet europiane, pasi morën 177 vende nga 751 në total. Socialdemokratët e holandezit Frans Timmermans të vendit të dytë me 148 vende janë qartësisht në lojën e shahut.
Çështja kryesore: në garën për postin më të lartë në Bruksel, pretendimet për pushtet kombëtar dhe rivalitetet institucionale luajnë një rol të madh. Madje vetë kërkesa themelore për suksesin e Weber, që të krijojë një shumicë parlamentare- është më e vështirë se kurrë për shkak të humbjes së votave nga të dy kampet kryesore.
Dhe më pas është presidenti francez, Emmanuel Macron, që dëshiron të pengojë bavarezin Weber që të zgjidhet si shef i BE-së.
Në zgjedhjet europiane, Macron u bashkua me liberalët e ALDE, që së bashku kanë 111 vende në Parlamentin Europian. Grupi dëshiron që të vendosë në krye të Europës një grua për herë të parë- danezen Margrethe Vestager.
Vetë Macron është një nga të humburit e mëdhenj të këtyre zgjedhjeve, pasi e parakaloi politikania e ekstremit të djathtë, Marine Le Pen./BILD
