Moti i keq ka sjellë një situatë të jashtëzakonshme në të gjithë territorin e Shqipërisë, duke shkaktuar përmbytje të mijëra hektarëve tokë bujqësore, shtëpi banimi, bllokim të rrugëve nacionale dhe rurale, pasoja këto nga fryrja e lumenjve, dëbora dhe stuhitë e shiut.
Me gjithë punën e madhe në terren nga forcat e ushtrisë si edhe forcat e ndërhyrjes lokale, ministrat dhe kryetarët e bashkive, gjendja është përsëri shumë shqetesuese.
Lidhur me këtë situatë është shprehur në rrjetet sociale edhe Presidenti Meta:
” Jam duke ndjekur me vëmendje të veçantë situatën kritike të krijuar, si pasojë e motit të keq dhe masat që po merren për tejkalimin e saj në disa zona të përmbytura dhe të bllokura nga reshjet e borës.
Jam informuar se situata paraqitet më problematike në Qarkut e Fierit, sidomos në njësinë administrative Levan, fshatin Ferras, ku janë evakuuar 15 familje dhe qindra hektarë tokë bujqësore, ndodhen nën ujë.
Përmbytje të shumta ka edhe në Qarkun e Vlorës, sidomos në zonën e Mifolit ku sipërfaqja e përmbytur e tokës bujqësore i kalon mbi 1200 hektarë, ndërkohë që shumë fshatra në Lumin e Vlorës rezultojnë të izoluara.
Gjithashtu në Veri, Veri-Lindje dhe Jug-Lindje të vendit shumë zona rezultojnë sot të bllokuara nga reshjet e shumta të borës.
Problematik është fakti se ashtu si në të kaluarën, autoritetet e Mbrojtjes Civile dhe Prefekturat nuk e kanë njoftuar më herët popullatën në zonat me risk të lartë, lidhur me parashikimin e hershëm sipas IGJEUM, që prej ditesh ka njoftuar autoritetet shtetërore në lidhje me parashikimin e motit.
Duke u solidarizuar me banorët e prekur nga pasojat e motit të keq, u bëj thirrje të gjithë institucioneve përgjegjëse shtetërore të angazhohen maksimalisht për sigurinë e jetës dhe të pronës.”