Aktualitet

Situata politike, 3 socialistë analizojnë krizën, Rama të tërhiqet






               Publikuar në : 09:18 - 19/06/19 |
mapo.al

Tre socialistët me peshë që kanë lënë gjurmë në këtë subjekt politik, Arben Malaj, Irena Beqiraj dhe Edlira Haxhiymeri gjykojnë se duhet të gjendet një zgjidhje në mënyrë të menjëhershme për të shmangur përplasjen politike dhe civile. 


Nga Sebi Alla



Ndërsa vendi është në kulmin e krizës së fortë politike dhe sociale, agresiviteti militantesk i rreshtuar në llogoret partiake, i ka shuar zërat qytetare dhe intelektuale që mund të ofrojnë një zgjidhje “të mesme të artë”. Secila palë duhet të lëshojë diçka për të fituar shumëçka, që në situatën e krijuar, do të thotë shmangie e përplasjes civile. Kur zërat që bëjnë thirrje për qetësi dhe zgjidhje të krizës vijnë si ish-përfaqësues të mazhorancës kanë edhe më shumë vlerë, ndonëse të pakët që po dalin publikisht në kritika ndaj mënyrës së qeverisjes.

Ish-ministri i Financave dhe deputet për disa legjislatura si përfaqësues i Partisë Socialiste Arben Malaj, në një intervistë ekskluzive për gazetën “Mapo” shprehet se ka besim që do të shkohet në një zgjidhje, pasi pasojat do të ishin mjaft të rënda për vendin. “Mendoj se është momenti që të gjithë ata që kanë mundësi të bëhen pjesë e zgjidhjes, duhet të vënë sfidat e vendit mbi preferencat e tyre individuale. E them këtë për të gjithë që kanë një jetë të gjatë politike. E dinë shumë mirë se çfarë ka vuajtur vendi në tranzicionit e tij”, -shprehet Malaj. Ish-ministri gjykon se edhe këtë herë faktori ndërkombëtar do të ushtrojë presion pozitiv që palët të gjejnë një zgjidhje, por në këndvështrimin e Malajt ajo duhet të jetë afatgjatë ku opozita të ofrojë alternativë dhe mazhoranca të japë zgjidhje, jo vetëm në shtyrjen e datës së zgjedhjeve, por në ofrimin e garancive ligjore dhe kushtetuese për të pasur zgjedhje të lira dhe ndershme.

Ish-zëvendësministrja e Ekonomisë dhe Financave Irena Beqiraj kritikon klasën politike në vend, duke nisur që nga Partia Socialiste ku ajo aderon. “Është deformuar vota nga të gjithë palët politike”, -shprehet Beqiraj, e cila shton se reflektimi duhet të fillojë nga brenda partive politike. “Intelektualët ikën, ose janë tërhequr frikshëm dhe kur ikin intelektualët mbeten gjithë njerëzit që e përdorin partinë që të bëhen deputetë, për t’u bërë ministra, kryetarë bashkie dhe drejtorë drejtorie. Jemi në kushtet që këta njerëz shikojnë partinë si një mundësi për të zënë tepsinë”, argumenton Beqiraj. Ish-deputetja e PS-së dhe profesoresha Edlira Haxhiymeri shprehet se konfliktualiteti i madh politik nuk vjen vetëm nga mungesa e votës së lirë dhe të ndershme, por edhe nga shuarja e zërave kritikë brenda subjekteve politike. “Pas 14 vitesh në krye të PS-së Edi Rama kontrollon në mënyrë absolute Partinë Socialiste. Kur them e kontrollon në mënyrë absolute, dua të theksoj që ka humbur çdo element demokracie”, -shprehet Haxhiymeri.

Arben Malaj: Duhet zgjidhje, kanë nisur shenjat e para të konfliktit civil

Jemi në një situatë ku sa më shumë afron data e zgjedhjeve të 30 qershorit, aq më shumë shtohet konflikti politik, që duket se nuk është më vetëm i tillë pasi ka edhe nuancë civile. Si e gjykoni situatën aktuale dhe cila mund të jetë zgjidhja?

Kjo që po ndodh në ambientin politik shqiptar nuk është për herë të parë, por nga pamundësia e një zgjidhjeje, duket sikur është për herë të parë. E gjitha kjo krijon disa kosto, ekonomike, sociale dhe politike. Ajo që të trishton më së shumti, në pamundësinë e gjetjes së një zgjidhjeje, është fakti se shqiptarët ndryshe nga qytetarët e ndërgjegjësuar në vende të tjera që kërkojnë lirinë dhe demokracinë, kanë gjetur ndoshta rrugën më të lehtë për ta, por më të vështirë për vendin, që është braktisja e vendit. Zhgënjimi i tyre ka çuar në braktisjen e vendit. Një vend që humbet kapital social dhe human, është një dëm i madh shpirtërisht dhe ekonomikisht. Pyetja që shtrojmë është se nëse shkojmë në zgjedhjet e 30 Qershorit, situata më 1 Korrik do jetë më e mirë apo më e keqe? Nëse do shkohet në një acarim, patjetër që situata bëhet më e vështirë. Nëse ndodh kjo, kostot që do paguajnë shqiptarët nga kriza politike do jenë më të mëdha. Kosto të krizës së besimit, mungesë kredibiliteti në institucionet publike, mund të jenë numër më i madh i braktisjes se vendit, pasi vala e parë ishin ata që shpresonin më mirë në perendim, vala e dytë për ata që kishin një mirafirmim dhe shikojnë vendin si pamundësi, dhe vala e tretë ajo e biznesit që ka dhënë shenjat e para që në një ambient politik të mbingarkuar, përkeqësohet situata ekonomike. Kështu që, kjo eshte ajo që duhet t’i ndërgjegjësojë politikanët tanë për një zgjidhje. Gjithmonë ka një zgjidhje. Ne jemi te situata për një zgjidhje pasi kriza ka ndodhur.

Nëse arrihet një marrëveshje e “orëve të fundit”, a është e qendrueshme nëse nuk vijohet me reforma të thella?

Hapi i pare, se çfarë do ndodhë në zgjedhjet e pushtetit vendor, hapi i dytë në reformat në Kodin Zgjedhor për ta bërë procesin zgjedhor më pak politik. Dhe hapi i tretë, zgjerimi i hapësirave për një demokraci më të drejtpërdrejtë. Unë akoma i mbetem mendimit për të gjetur një zgjidhje jo thjesht në hatër të politikanëve, por për të mos e çuar vendin e tyre për një konflikt civil. Nuk e besoja 2 javë më parë tensionimin social. Duke parë se çfarë po ndodh në bashkitë e vendit, atëherë ky risk është rritur. Janë jo vetëm bashkitë e opozitës, por kam parë në deklarime të përfaqësuesve të PS-së që kërkojnë një mandat të dytë apo të tretë që shprehen se do i menaxhojnë vetë zgjedhjet. Kjo do të thotë që mund të krijohen konflikte civile të cilat vazhdojnë për një kohë të gjatë. Ne e dimë që një konflikt civil i nisur vazhdon gjatë.

Kohët e fundit kemi elemente të një konflikti edhe institucional, sa e rrezikon kjo situatën në vend?

Mungesa e institucioneve nuk mund të përligjet nga politikanët shqiptarë për mungesë të një zgjidhjeje. Përgjegjshmëria është e madhe. Këto institucione që mungojnë nuk i kompenson përgjegjshmëria ndaj vendit që orientohet drejt kompromisit për kapitale. Institucionet kushtetuese bëhen të domosdoshme kur palët krijojnë debate të ashpra. Në këtë lloj agresiviteti në këtë krizë mosbesimi, kam frikë se agresiviteti do të vazhdonte. Përgjegjshmëria kryesore duhet të bjerë mbi individë, ndërsa garancia të vijë nga institucionet. Mendoj se është momenti që të gjithë ata që kanë mundësi të bëhen pjesë e zgjidhjes, duhet të vënë sfidat e vendit mbi preferencat e tyre individuale. E them këtë për të gjithë ata që kanë një jetë të gjatë politike. E dinë shumë mirë se çfarë ka vuajtur vendi në tranzicionin e tij. Shqipëria ka pasur tranzicionin më të vështirë në gjithë vendet e Europës, e ka nisur me 200 dollarë për frymë dhe sa herë që mendohet një krijim bazueshmërie për të shkuar më lart, ne krijojmë kriza dhe riprodhojmë kriza, aq sa ne humbëm avantazhin që në procesin e integrimit ishim më përpara se të gjitha vendet e Ballkanit Perëndimor, sepse nuk kishim konflikte fetare dhe etnike, si rrënjët e luftërave, dhe mentaliteti i përgjithshëm shqiptar është mendjehapur dhe e pranon bashkëpunimin me vendet kufitare dhe nuk bazohet tek e shkuara por për të shkuar më larg tek e ardhmja. Shqiptarët kanë kontribuar pozitivisht në Maqedoni dhe në Mal të Zi. Janë mbështetësit më të medhenj në integrimin në NATO dhe në BE më shumë se maqedonasit dhe malazezët. Gjithë këtë sinergji pozitive të një kombi, shteti e ka për detyrë ta maksimizojë. Do të duhet që opozita të ketë një paketë, një propozim. Duke e propozuar ajo nevojën ligjore qoftë në Kushtetutën e partisë politike qoftë dhe Kodin Zgjedhor, që të konsiderohet e papranueshme nga pikëpamja ligjore, braktisja e parlamentit duke hedhur poshtë mandatet. E dyta, është se mazhoranca duhet të bëhet pjesë e zgjidhjes në një zgjidhje jo vetëm për të shtyrë zgjedhjet, ajo është vetëm një gjë. Shqiptarët janë të zhgënjyer. Duhet një përmirësim në Kodin Zgjedhor por edhe në Kushtetutë. Në të gjitha vendet janë kthyer forca të reja politike që e kanë prishur status quo-në dhe kanë mundur të reduktojnë keqkuptimet kushtetuese. Nëse kjo nuk krijohet, pasi sistemi është i mbyllur, ne asnjëherë nuk do kemi zgjidhje për problemet tona, por do ketë një zgjidhje për të mbijetuar për krizat e radhës.

A mendoni se kriza do të zgjidhet nga palët politike në vend, apo do të mbërrijë si presion nga faktori ndërkombëtar?

Duke qenë lektor i Integrimit Europian, e theksoj se nëse do të bëhesh vend i NATO-s, vend i BE-së, duhet të jemi vullnetarë të lëshimit të një pjese të sovranitetit. Kështu që qëndrimet kategorike që ndalimin ta zgjidhim vetë, nuk përputhen me atë sfidë që ka Shqipëria. Sidomos partnerët tanë, SHBA dhe BE-ja jo vetëm që duhet të na asistojë, por dhe të imponojnë, për reforma që rrisin demokracinë. Ne duhet ta ndajmë, duam të jemi shqiptarë krenarë në kalatë tona me flamur në dorë, apo duam të jemi pjesë integrale e Europës duke respektuar standardet e tyre.

A nuk është e gatshme shoqëria shqiptare edhe pas 29 vitesh “sistem demokratik” të marrë vetë në duar fatet e saj? 

E para është shkalla e lartë e kapjes së shtetit, e influencës së shtetit deri te vendi i punës, te mbijetesa. E dyta, politika shqiptare është shumë më pak europiane se populli i saj. Më shumë gjejnë rehatinë e tyre se sa udhëheqin gjërat demokratizuese dhe sfiduese. Kur shikon vendet e tjera si Greqia, Italia, Maqedonia, Spanja etj., ishin shumë më të inspiruar njerëzit dhe nuk kishin një shoqëri civile të fjetur. Kur shikon se një komik fiton president i Ukrainës në një vend që është fuqi bërthamore, do të thotë që këto shoqëri e kërkojnë lirinë dhe nuk kërkojnë t’ua sjellin. Te ne ka një pozicion pasiv edhe për shkak të kulturës, pasi gjithmonë janë dashur të huajt të bëjnë presion se sa kemi iniciuar ne proceset. Ne kemi iniciuar konfliktet dhe krizat.

 

Irena Beqiraj: PS dështoi në garantimin e votës, u bë pragmatiste

Jemi në një situatë ku sa më shumë afron data e zgjedhjeve të 30 qershorit, aq më shumë shtohet konflikti politik, që duket se nuk është më vetëm i tillë pasi ka edhe nuancë civile. Si e gjykoni situatën aktuale dhe cila mund të jetë zgjidhja? Ka përplasje forcash mes “të bindurve politikë”, por a po ndihet disi zëri i elektoralit gri?

Çfarë mund të them për situatën aktuale? Kur deputeti i Partisë Socialiste thotë unë jam në të drejtën time që t’u kërkoj anëtarëve të PS-së që të bëjnë të ditur votën?! Unë jam në Partinë Socialiste dhe mendoj që jam për të kontribuar për forcën politike me ide, me integritet edhe duke zbatuar parimet bazë dhe jo për të bërë të ditur votën. Kjo tregon që, të dy partitë kryesore nuk marrin pushtetin duke ofruar alternativë, por duke manipuluar votën e sovranit. I gjithë sistemi ynë politik është ngritur mbi këtë bazë. Duan vetëm të marrin pushtetin. Eshtë problem që e kemi në të dyja partitë. Dikur ziheshin komisionerët me njëri-tjetrin, pastaj hyri në lojë policia, më pas u bë problem mos numërimi i votave, pastaj edhe blerja e saj. Shoqëria jonë e ka kuptuar këtë dhe kjo duket qartazi po të analizoni elektoratin gri, që po shtohet në çdo zgjedhje, e sot janë më shumë e 50 për qind. Pjesa tjetër që shkon e voton nuk është se beson. Çdo ditë e më shumë, aty futen njerëzit që në fund të ditës do të duhet të marrin disa vendime pragmatiste. Unë mendoj se duhet të fillojë një reflektim brenda partive. Ajo që pashë te seanca për rezolutën për shkarkimin e Presidentit ishte e rëndë, nuk i futem debatit që presidenti ka shkelur Kushtetutën ose jo. Të gjithë mund të kenë një opinion për këtë, por i vetmi institucion që e gjykon është Gjykata Kushtetues. Ajo seancë plenare ishte një maskaradë. Aty doli qartë që në partinë ku unë aderoj, nuk ka trima, por ka qejflinj trimash. Kjo ishte më e dhimbshmja. Nuk pashë një njeri që të dilte që të thoshte ç’po bëjmë, duke bërë një gjyq politik, pa folur më parë Gjykata Kushtetuese? A nuk e shkelën po këta burra kushtetutën kur vunë President një kryetar partie? Nuk u gjend në atë kohë një intelektual i pavarur siç e kërkonte Kushtetuta. Duket sikur po përjetojmë përrallën e Aladinit. Presidenti është herë dreqi, herë xhindi, mazhoranca është Aladini, pushteti është llamba dhe opozita magjistari i keq që kërkon llambën…

Si mund të kalohet kjo krizë dhe nëse kalohet sa e qëndrueshme do të jetë në vijim?

E vetmja zgjidhje është të reformohen partitë, pasi ato janë kthyer në pellgje ku nuk lëviz asgjë. Kjo është ulëritëse, nëse vazhdojnë të mos ofrojnë asgjë të re përveç konfliktit, në kërkim të pushtetit kanë braktisur çdo filtër, duke sofistikuar vetëm mekanizmat e manipulimit të votës. Shqiptarët nuk zgjedhin, shqiptarët shkojnë e votojnë në këto 30 vite. Mendoja që çdo intelektual në parti duhet të kontribuonte për vendin edhe vetëm kështu mund t’i shërbente edhe partisë. PS-ja është dalluar, pikërisht se ka mëtuar liberalizmin në vend të autoritarizmin. PS-ja ka qenë parti civile dhe ka ushqyer debatin. Durimin nuk e ka konsideruar kurrë nënshtrim, duket që i kemi braktisur këto cilësi. Në bindjen time, mazhoranca dhe Rama duhet të tërhiqej siç bëri edhe në vitin 2017. E nëse na “kujtojnë Kushtetutën”, duhet t’u kujtohet se e kanë shkelur frymën e Kushtetutës kur zgjodhëm një President që ishte kryetar partie. Zgjedhjet lokale një ditë do të bëhen, pasi nuk janë në dorë të Presidentit. A do të bëhen në 30 Qershor apo 30 Shtator, popullit kjo nuk i intereson. Kjo që po ndodh është lojë force. Popullit i intereson të këtë mundësi zgjedhjeje, një votim i qetë, pak rëndësi ka për ta data. Jemi para faktit të ndarjes që është bërë tani në bashkitë që drejtohen nga kryetarë të opozitës të cilët kanë filluar të bëjnë një lloj rezistence për të respektuar dekretin e Presidentit. 22 bashki nuk duan ta njohin datën e zgjedhjeve dhe i përmbahen dekretit të presidentit, ndërsa 38 bashki duan të shkojnë në zgjedhje.

Unë shpresoj dhe bëj thirrje për zgjidhje. Nuk e di nëse do ketë një marrëveshje në një tavolinë të përbashkët apo një marrëveshje të njëanshme, por një nga palët duhet të tërhiqet. Nëse do shpërndahet parlamenti, siç po aludohet në media do të thotë që është tërhequr opozita atëherë opozita do të detyrohet të shkojë në zgjedhje të parakohshme me Edi Ramën. Kjo do të thotë që opozita është tërhequr nga kërkesa e saj. Kjo mund të ishte një zgjidhje.

Nëse gjendet zgjidhja ndoshta edhe me ndërhyrjen e faktorit ndërkombëtar, po sa e qëndrueshme do të jetë, kur kemi fenomen negativ me çështjen votë…30 Qershori po afron, palët janë më se të ndara, a ka vend që dikush duhet të tërhiqet?

Mund të shkojmë në zgjedhje të parakohshme, por problem mbetet se si do zgjidhim çështjen e manipulimit të votave ku partitë kanë vënë tulla në këtë mur të lartë që na ka ndarë ne me demokracinë. Deri tani kemi këto parti që e përdorin forcën politike vetëm për të ardhur në pushtet. Partitë duhet të kenë ide, vizion plane të qarta për zhvillimin e një vendi, në të kundërt populli nuk duhet të dalë në zgjedhje. Faktori ndërkombëtar nuk mund të na i zgjidhë këto probleme, ai do të ofrojë zgjidhje të shpejta, sepse nuk mund të marrë kazmën e “të prishë” e të rindërtojë sistemet tona. Faktori ndërkombëtar është i lodhur me ne, madje së fundmi, i çoroditur nga informacionet kontradiktore. Le të themi është ndarë në dy pjesë; Brukseli teknik që shprehet pro hapjes se negociatave dhe Brukseli politik është sot më skeptik se kurrë apo që thotë jo. Do të duhet shumë punë që faktori ndërkombëtar të ndryshojë sërish. Kishim e kemi nevojë për më shumë qetësi, urtësi nga ana e mazhorancës. Çdo fitore e momentit mund të jetë parathënia e humbjes në të ardhmen. Intelektualët ikën, ose janë tërhequr frikshëm nga partitë, dhe kur ikin intelektualët, mbeten gjithë njerëzit që e përdorin partinë për interesa personale, për t’u bërë deputetë, për t’u bërë ministra, kryetarë bashkie apo drejtorë drejtorie. Jemi në kushtet që këta njerëzit shikojnë partinë si një mundësi për të zënë tepsinë, edhe jo për të përmirësuar Shqipërinë. Idealisht do të doja të mos i shikoja më protagonistë në politikën shqiptare as Lulzim Bashën, as Sali Berishën, as Edi Ramën. Besoj që ka ardhur koha të tërhiqen njëherë e mirë, pse jo edhe Monika Kryemadhi. Kjo do ishte një zgjidhje ideale. Kanë dështuar të ndërtojnë shtetin dhe demokracinë, kanë prodhuar vetëm konflikte. Jemi të pashpresë nëse i mbajmë sytë vetëm te këta të katërt. Këta janë të zëvendësueshëm. Bënë aq sa ditën edhe mundën, por kanë treguar më shumë se një herë që janë në pamundësi për të ofruar më të mirën. Të gjithë ata që do vinin më pas duhet ta kuptojnë që të jesh lider i një partie duhet të kesh një objektiv. Në momentin kur objektivi nuk përmbushet, nuk është fundi i botës që ti ta lësh drejtimin e saj. Ne nuk kemi akoma burra shteti ose liderë që të bëjnë një ndarje siç duhet me pushtetin. Argumentet që sot përdor Partia Socialiste e lidershipi i saj janë të njëjtat argumente që për çështje të caktuara kanë përdorur edhe kundërshtarët tanë. Dikur përdorej nga PD-ja në pushtet që “përgjimi nuk është prove”, tani po përdoret gjerësisht nga PS. Na ka mbetur i njëjti argument dhe nuk kemi arritur të themi diçka ndryshe. Kemi mbetur në debatin shterpë. Cila është më e rëndë? Manipulimi, mosnumërimi apo blerja? Duhet të pranojmë që Partia Socialiste në këtë rast dështoi të ofronte një luftë pa kompromis kundër manipulimit të votës, thjesht u bë pragmatiste.

 

Edlir Haxhiymeri: PS nuk ka më intelektualë, ka humbur cdo element demokracie

Jemi në prag të një krize të madhe politike, kemi agresivitet të shtuar sa më shumë afron data 30 Qershor, ku njëra palë thotë po shkoj në zgjedhje edhe e vetme, ndërsa pala tjetër është në rrugë. Si mendoni se do zgjidhet kjo çështje? A do gjejmë një zgjidhje në momentet e fundit?

Jemi në një krizë të jashtëzakonshme qoftë në aspektin politik, por dhe juridik dhe social. Jemi në një krizë të rëndë. Kemi një Parlament shumë problematik. Kemi mungesë të Gjykatës Kushtetuese dhe të Lartë. KQZ-ja që funksionon me politikë dhe jo me mandate juridike. Kjo është shumë e vështirë për të parashikuar si do shkojë. Nuk flitet më se si do të funksionojë ligji, a ka vend për argumentin juridik, në këto momente fiton ai që bën më shumë presion. Kur them presion, kam parasysh mjete të ndershme dhe të pandershme. Por cila palë ka më shumë mjete të tilla në dispozicion. E vështirë ta them këtë. Kjo situatë ka ardhur si rrjedhojë e Reformës në Drejtësi, e cila në vend që të përmirësonte funksionimin e shtetit ligjor, solli probleme më të mëdha, me dashje apo pa dashje nuk jam në gjendje ta them. Në këto moment do t’u bëja thirrje aktorëve t’i thërrasin logjikës së ligjit. Të ulen dhe të bëjnë zgjidhjen më të mirë, është jashtë çdo lloj pritshmërie, pasi në fund ata që do ta vuajnë jemi ne qytetarët e thjeshtë.

Nëse do të arrihet drejt një zgjidhjeje, mendoni se do vijë nga politika brenda apo do ketë trysni ndërkombëtare e cila gjithsesi e mësuar edhe me kriza të shumta politike në vend duket se kanë një lodhje dhe gati-gati tani duket sikur na kanë lëshuar sfidën: “Bëni çfarë të doni”… Mendoni që faktori ndërkombëtar do të ndërhyjë në momentet e fundit?

Unë nuk besoj te faktori ndërkombëtar. Ata kanë patur kohë të mjaftueshme për të bërë më të mirën dhe nuk e kanë bërë, kanë qenë indiferentë. U intereson stabiliteti i përkohshëm, sa ta kem unë mandatit pas meje të bëhet çfarë të dojë. Unë besoj tek intelektualët, te brezi 30–40-vjeçar dhe të miredukuar. Ata idealistë që besoj të ekzistojnë midis nesh që duhet të krijojnë një frymë të re. Një organizim për të përcaktuar parimet mbi të cilat ky vend duhet të zhvillohet. Flas parimet politike ekonomike, si duam ne të zhvillohet Shqipëria. Si një vend gangsterësh apo si një vend europian? Duhet të mblidhen sa më shpejt dhe t’i bëjnë presion politikës. Politika nuk i ka dëgjuar kurrë intelektualët, në kohët e sotme edhe më keq. Ata janë zëvendësuar nga trafikantët. Sot duhet që këta intelektualë të bëjnë presion. Shumë pak janë nëpër media sepse hapësira për ta është e vogël. Unë nuk besoj te ndërkombëtarët, por besoj te Shqiptarët.

Jemi në një krizë jo vetëm politike, por edhe institucionale. Si mund të shkojmë drejt një zgjidhjeje të mundshme?

E kam të vështirë të parashikoj me këta aktorë që janë në fushë. Mendoj se një presion i madh publik, për t’u ulur dhe për të krijuar hapësirë. Elita e këtij vendi të përfshihet në përcaktimin e rregullave të lojës. Kushtetuta është bërë paçavure, ndërsa kemi nevojë për ndryshim sistemi. Ky ndryshim nuk vjen nga aktorët që e shkaktuan problemin. Duhet patjetër të ketë një pjesëmarrje aktive të njerëzve profesionistë, të pastër, të vërtetë dhe jo profesionizmin që zgjedh politika. Shqipëria ka plot profesionistë që janë strukur dhe nuk flasin. Sot është dita që ata të thonë fjalën e tyre për të nxjerrë vendin nga kriza.

A mendoni që thelbi i gjithë këtij kaosi të madh të krijuar është krijuar nga mungesa e votës së lirë dhe të ndershme?

Mund të them që edhe mungesa e votës së lirë është një faktor, për sa kohë qytetari nuk e ndjen veten pjesë të vendimmarrjes, për sa kohë nuk mund të organizojmë referendum për jetën tonë, për standardet tona, kuptohet që kjo ka krijuar këtë lloj situate. Të ashtuquajturit të zgjedhur ndihen fuqiplotë kur ata kanë raporte të drejtpërdrejta dhe të mira me liderin që i zgjedh. E kuptoni çfarë arrogance ka në përfaqësues në parlament apo qeveri. Janë arrogantë dhe nuk të japin përgjigje. Njerëzit lusin të mos kemi nevojë për të shkuar tek ata sepse e di qytetari që atij s’i intereson fare. Ai ka ardhur aty jo përmes votës, por mes raportit me shefin e tij.

Ju keni qenë pjesë e strukturave të rëndësishme vendimmarrëse të Partisë Socialiste. Nga një parti që ngjallte debat dhe jepte alternativë, sot është kthyer në një parti autoritare dhe në mungesë të mirëfilltë alternativash debati. Nuk ka alternativë idesh dhe diskutime të hapura, pse ndodh kjo?

Kjo është e vërtetë. Pas 14 vitesh në krye të PS-së Edi Rama kontrollon në mënyrë absolute Partinë Socialiste. Kur them e kontrollon në mënyrë absolute, dua të theksoj që ka humbur çdo element demokracie. Njerëzit nuk kanë të drejtë të flasin, kjo është fatkeqësia më e madhe. Një forcë politike që synonte standardet europiane është kthyer në modelin më të shëmtuar të autokracisë dhe kontrollit absolut. Nuk ka më intelektualë. Ata që janë atje kanë ardhur në mënyrë të tërthortë dhe jo me bindje. Janë ngritur një ditë në mëngjes dhe e kanë gjetur veten në struktura dhe anëtarë të kryesisë, njerëz që nuk e dinin ku ishte partia. E kanë gjuajtur me gurë atë parti në kohën kur zhvillohej dhe demokratizohej. Kur u njoha me demokratizimin brenda kësaj partie thashë pse mos të kontribuoj. Kjo gjë tani mungon totalisht. Ka njerëz që i kanë bërë keq asaj force politike, ndërsa sot janë ministra. Këta njerëz nuk mund të krijojnë debat dhe nuk mund t’i japin një partie që kërkon përparimin. Ndërsa fatkeqësisht edhe disa deputetë që kanë mbetur si “socialistë”, zëri i tyre nuk po ndihet. Kujtoj një thënie amerikane: “Njeriu është i gatshëm të shesë lirinë për mbijetesën”, kjo i shkon shumë përshtat atyre njerëzve që unë i bëj bashkëfajtorë. Kanë zgjedhur të mbijetojnë duke shitur lirinë e tyre.

 


Etiketa: , , , , ,

CLOSE
CLOSE
Pas