Italia dhe Spanja do të përballen sonte në një ndeshje gjysmëfinale në Euro 2020, e cila premton të jetë klasike, nisur nga forma e të dy ekipeve kombëtare.
Takimi i sotëm në Wembley do të jetë i katërti radhazi në Kampionate Europiane mes këtyre dy ekipeve. Fituesi i këtij takimi takohet në finalen e 11 korrikut në Wembley me fituesin e takimit tjetër gjysmëfinal mes Anglisë dhe Danimarkës.
Ky do të jetë takimi i shtatë mes Italisë dhe Spanjës në europiane, me Spanjën që vetëm një herë ka fituar brenda 90 minutave, në finalen e vitit 2012 kur triumfoi 4:0.
Italia e mundi Spanjën në 1/8 e finales të Kampionatit të kaluar Europian, Euro 2016, duke e nxjerrë jashtë kompeticionit.
Spanja është në kërkim të titullit të tretë europian, ndërkohë që Italia e ka fituar europianin vetëm një herë, në vitin e largët 1968.
Pritshmëritë për këtë takim janë të mëdha, megjithatë Italia është treguar më bindëse me lojë.
Skuadra e Roberto Mancinit nuk ka pësuar humbje në 32 ndeshjet e fundit, që prej shtatorit të vitit 2018.
Ndërsa, Spanja e Luis Enriques e ka pësuar vetëm një humbje në 29 ndeshjet e fundit dhe është e pamposhtur në 13 sfidat e luajtura radhazi.
