Ish-shefi i repartit të kardiokirurgjisë, Edvin Prifti po hetohet nga SPAK nën dyshimet se ka abuzuar me tenderat në qendrën Spitalore Universitare “Nënë Tereza”, ç’ka ka gjasa të zgjerojë rrethin e bluzave të bardha apo zyrtarëve të tjerë të përfshirë ne veprimtari kriminale.
“Hetimet në lidhje me Edvin Priftin janë shtrirë edhe në drejtim të disa procedurave të prokurimit të realizuara nga QSUT. Lidhur me këto procedura prokurorimi është e rëndësishme të administrohet dokumentacioni, të evidentohet pozita e të dyshuarit si dhe të pyeten edhe anëtarët e komisionit të Vlerësimit të Ofertave, njësisë së prokurimit, apo edhe të operatorëve ekonomikë që kanë marrë pjesë në tender” – thuhet në dokumentin e SPAK, përmes të cilit është firmosur zgjatja e hetimeve për kardiokirurgun edhe për një afat prej 6 muajsh.
Kardiokirurgu është nën hetim prej muajsh, për korrupsion e pastrim parash, pasi ra në rrjetën e përgjimeve teksa Prokuroria hetonte rastet e korrupsionit në Gjykatën e Krujës, ku sekretarja e këtij institucioni fliste për ryshfet, për operacionin e nënës së saj.
Mjeku u pezullua fillimisht nga ushtrimi i profesionit, por gjatë kontrollit në shtëpi e zyrë iu gjetën gjysmë milionë euro, prej nga u ngritën dyshime edhe për vepra të tjera penale.
Në vazhdim, prokurorët specialë këqyrën telefonin e Priftit, kompjuterin e punës dhe një lap top, ku zbuluan të dhëna të reja që i orientuan prokurorët specialë të hedhin sytë nga tenderat.
Prokuroria thotë se gjatë këtyre gjashtë muajve do të thërrasë në dëshmi shumë persona, përfshirë dhe mjekë, të cilët rezultojnë në kontakte telefonike me të dyshuarin Prifti, dëshmia e të cilëve mund t’i shërbejë hetimit.
Etiketa: Edvin Prifti, korrupsion, prokurimet publike, ryshfet, tenderat
