Ministrja e Shtetit, Elisa Spiropali, e cilësoi sot kërkesën e Komisionerit për Zgjerimin, Varhelyi, që të pritet opinioni i Komisonit të Venecias, lidhur me ndryshimet në Kodin Zgjedhor, si një mesazh ngushëllimi për opozitën.
“Po, Komisioneri edhe ndonjë mesazh ngushëllues për Opozitën do e japë”, tha Spiropali duke ironizuar.
Me këtë qëndrim të Elisës, mazhoranca ka shkuar edhe një hap më larg në kursin e përplasjes me BE-në.
Tanimë, jo vetëm që nuk e përfill qendrimin e tyre, por edhe e tall dhe përçmon.
Duhet kujtuar këtu, se shumë eurodeputetë, dhe Komisioni i BE-së, kanë ripërsëritur gjithë këto ditë, që reforma zgjedhore është kusht për integrimin.
Madje, ata folën konkretisht, duke përmendur konferencën ndërqeveritare të fundvitit, se me këtë mënyrë, qeveria po nxit shtyrjen e vendimit.
Më herët, sot Edi Rama në Kuvend, i quajti 8 eurodeputetë që i kanë dërguar atij një letër për këtë çështje, si të painformuar dhe të shfrytëzuar.
