Gjatë mbledhjes së Konferencës së Kryetarëve, deputetja e Elisa Spiropali tha se Partia Socialiste nuk ka synim të zgjedhë një President të PS. Sipas saj, mazhoranca ka ato kriteret e veta sesi duhet të jetë presidenti i ri, duke pasur parasysh edhe pushtetin e madh që ka marrë PS.
Nga ana tjetër, ajo u shpreh se pranon propozimet e opozitës, por jo kushtet që ajo vendos.
“Ka një kohë për të bërë politikë, ka një kohë për të bërë procedurë, edhe të dyja njëkohësisht. Në Kushtetutë thuhet qartë se si zgjidhet procesi kushtetues. Këtu është bërë zakon të flitet për procese të brendshme të Partisë Socialiste në një kohë kur në palën tjetër s’ka fare proces. Përsëriten propozimet me zarfe, apo konsultimet me shoqërinë civile. A thua se kjo është mëkat. Ne nuk kemi vendosur asnjë kusht për opozitën. Sigurisht që kemi konceptet tona për një profil se si duhet të jetë Presidenti i Republikës, duke pasur parasysh edhe pushtetin e madh që kemi akumuluar, ku këtu ka kontribuar opozita duke ikur nga procese shumë të rëndësishme. Ne nuk duam një President të të PS-së. Duam të marrim nga ju emrat më të mirë, por nuk duam kushte”, tha Spiropali.
