Presidenti i Institutit Liberal “Pashko”, Preç Zogaj tha sonte se debati politik që bëhet këto ditë në Shqipëri për çështjen e financimeve ruse në politikën shqiptare është mbyllur njëherë para pak kohësh me vendim gjykate në vendin tonë. Zogaj deklaroi se Lulzim Basha e ka mbyllur në gjykatë çështjen.
I ftuar në emisionin “Publikisht” në RTSH, Zogaj bëri një sqarim të situatës që bëri bujë në median shqiptare. A tha se fakti që një lobist amerikan ka marrë 500 mijë dollarë nga një kompani guackë për të punuar për interesa të Partisë Demokratike nuk është i fshehtë, por tani është thënë edhe nga një institucion i SHBA-së.
“Lulzim Basha e ka mbyllur në gjykatë çështjen Ajo është mbyllur, le të rrijë e mbyllur, shyqyr që është e mbyllur në Shqipëri, por nuk di se çfarë ndodh më tej. Mbetet fakti që lobisti Nik Muzin ka deklaruar 500 mijë dollarë në Departamentin e Thesarit duke pranuar edhe origjinën e tyre. Ai pranon se i ka marrë nga një kompani guackë skoceze për hesap të Partisë Demokratike të Shqipërisë. Këto ka thënë ai duke mos u futur më thellë.
Një analist kishte bërë një investigim dhe tha se kjo kompani guacke kishte nja dy rusë. Aty u ngrit kjo historia e rusëve. Disa prej nesh thanë se ajo është revistë e majtë, e manipuluar, e instrumentalizuar. Tani e thotë një institucion zyrtar i SHBA-së. Institucioni thotë faktin se këto para janë marrë nga kompania guackë në të cilën janë edhe ca rusë, paratë janë marrë nga Nik Muzin për t’i shërbyer Partisë Demokratike.
A është ky një fakt i shkëputur nga gjithçka që ka bërë partia Demokratike? Po mund të jetë, por jemi përpara kësaj historia. Nuk jemi përpara situatës se kush do të hetohet, apo kush do të ri-hetohet,” deklaroi mes të tjerash Preç Zogaj.
