Një studim i ri ka zbuluar, se qentë mund të jenë edhe më të mirë në zbulimin e rasteve të COVID-19, sesa testet laboratorike. Me shqisën e tyre superiore të nuhatjes, u zbulua se qentë ishin po aq të besueshëm sa testet PCR për zbulimin e rasteve të COVID-19.
Kur bëhej fjalë për infeksionet asimptomatike të koronavirusit, qentë evidentuan rastet, gjë që nuk mund ta bëjnë aq saktë testet PCR ose antigjeni.
Gjetjet e publikuara këtë javë në revistën PLOS One, mund të jenë efektive për vendet publike. “Qeni nuk gënjen,” i tha “Science News”, Dominique Grandjean, një veteriner në Shkollën Kombëtare të Mjekësisë Veterinare të Alfort në Francë, njëkohësisht autor i studimit.
Nga ana tjetër, vuri në dukje ai, shumë gjëra mund të shkojnë keq me testet PCR.
Në studimin që përfshinte mostrat e djersës së 335 personave, qentë e stërvitur nuhatën 97 për qind të rasteve të koronavirusit që ishin identifikuar edhe nga testet PCR dhe të 31 rastet e COVID-19 midis 192 njerëzve që nuk kishin simptoma.
Si u trajnuan qentë për të nuhatur COVID
Për studimin, u trajnuan qentë që i përkisnin zjarrfikësve francezë dhe ministrisë së brendshme të Emirateve të Bashkuara Arabe. Ekipi e bëri këtë, duke i shpërblyer me lodra, kur ata identifikuan saktë një mostër pozitive.
U deshën tre deri në gjashtë javë për të trajnuar shumicën e qenve, për të zgjedhur rastet e COVID-19 nga mostrat e djersës.
Studiuesit thanë në punimin e tyre se “testimi i qenve është jo-invaziv dhe ofron rezultate të menjëhershme dhe të besueshme” dhe se studimet e mëtejshme do të fokusohen në vlerësimin e qenve nuhatës për para-testet në qendrat e udhëtimit si aeroportet dhe hekurudhat, si dhe kulturore dhe ngjarjet sportive.
Çfarë nuhasin në të vërtetë qentë?
Qentë janë trajnuar për të zgjedhur rastet e COVID-19 që në fazat e hershme të pandemisë.
Një organizatë bamirëse “Qentë e Zbulimit Mjekësor”, filloi t’i vendosë burimet e saj drejt zbulimit të koronavirusit që në prill 2020. Dr. Claire Guest, CEO i bamirësisë, në atë kohë e krahasoi procesin me atë të trajnimit të një someliere.
“Së pari ju mësoni rajonin e rrushit, sëmundjen. Ndërsa komplikoheni gjithnjë e më shumë, mund të zgjidhni edhe hardhinë individuale dhe ky është zbulimi i virusit,” tha ajo.
“Sapo të keni arritur në atë pikë, një qen mund të ecë drejt një individi që lëshon erën e një virusi dhe qeni mund të trajnohet të ulet para tyre dhe të thotë se ky person në fakt e ka marrë virusin, edhe nëse janë asimptomatike”.
Grandjean nuk është i sigurt pse ka ende një ngurrim nga ana e disa mjekëve dhe zyrtarëve për të përdorur qentë për zbulimin e COVID, pavarësisht studimeve të tilla, si ai që tregon se sa të aftë mund të jenë ata në zbulimin e sëmundjeve, përfshirë kancerin.
“Sa herë që merrni një avion, është për shkak se qentë kanë nuhatur bagazhet tuaja (dhe nuk kanë gjetur) eksploziv. Pra, ju u besoni atyre kur merrni një avion, por nuk doni t’u besoni atyre për COVID?” tha ai për Science News./Përshtati Liberale.al
