Kryebashkiaku i Fierit, Armando Subashi, deklaroi se spitali i ri i Fierit do të ndërtohet, pavarësisht vullnetit që kanë pronarët e tokës.
Në një bashkëbisedim me fermerët e fshatit Daullas, që dolën paraditen e sotme në protestë, Subashi u premtoi dëmshpërblim për tokën, ndërsa theksoi se ndërtimi i një vepre publike nuk kërkon pëlqimin e pronarëve.
“Veç atyre që diskutuam dje (nuk kemi tokë për të shitur thanë banorët, dhe e ndërprenë fjalën e kryebashkiakut)… Ti dje s’ke qenë në takim, unë kam bërë takim dje me të gjithë pronarët, dhe u kam komunikuar vendimin që është marrë me kryeministrin dhe me ministren, kemi gjetur se kush është më e përshtatshmja. Bëhet fjalë për një vepër që do t’i shërbejë të gjithë banorëve të jugut. Nga shumë variante, u gjykua që ky varianti këtu është më i përshtatshëm, është pranë rotondos, dhe krijon akses për të gjithë jugun.
Ne kemi nxjerrë pronarët, listën e pronarëve, bëmë takimin dje, ku unë u thashë se vendimi është marrë dhe do fillojmë procedurat e shpronësimit. Unë kërkova që të bëjmë një marrëveshje të përbashkët, që edhe punimet mos të pengohen, por edhe ju të merrni dëmshpërblimin (banorët e konsiderojnë qesharak). Dëmshpërblimi duhet të jepet sipas ligjit të shpronësimeve publike.
Ligji është i pandryshuar, qoftë nga qeveritë e majta qoftë nga ato të djathta. Ligji nuk kërkon pëlqimin e pronarëve. Ku vendoset që të bëhet vepra publike, shpronësimi bëhet sipas ligjit, nuk mund të pengohet vepra publike”, – tha Subashi.
Risjellim në vëmendje se spitali i ri i Fierit do të ndërtohet nga Turqia brenda tre muajve, përpara zgjedhjeve më 25 prill. Delegacioni turk pritet që të mbërrijë në Shqipëri përgjatë kësaj jave.
